Minister di Finansa, Geoffrey Wever, a tene su prome reunion oficial cu College Aruba Financieel Toezicht (CAft). Durante e reunion ameno a toca e temanan di, entre otro, e trayectoria di con y dicon a bin cu un e nota di cambio riba e presupuesto 2025 y tambe a dialoga riba e preparacionnan andando pa presupuesto 2026.
Gabinete AVP- FUTURO su plan di gobernacion ta un plan integral cu tin como punto di salida cu tur hende mester beneficia di e desaroyo economico y un reparticion husto di e recursonan di nos pais. P’esey e gabinete nobo a entrega un nota di cambio pa asina e pensionadonan haya 250 florin extra pa luna desde 1 di mei y baha accijns riba gasolin y diesel tambe desde 1 di mei. E nota di cambio aki, riba e mesun dia cu gabinete a huramenta, tabata necesario pa di biaha duna bek desde 1 di mei ⎯ en bes di 1 di juni. Mientrastanto ayera 2 di april, conforme ley, Minister di Finansa Geoffrey Wever a manda e presupuesto 2025 aproba unanimamente pa Parlamento di Aruba pa CAft pa conseho.
Durante e reunion cu CAft, ministro Geoffrey Wever a enfatisa cu e maneho pa finansa publico ta uno duradero y ta un refleho di e maneho di Gabinete AVP- FUTURO pa drecha entre otro poder di compra, baha costo di bida y duna siguransa na inversionistanan local y internacional di un maneho financiero prudente y transparente manera palabra den e Programa di Gobernacion 2025- 2028.
Como minister di Finansa punto di salida ta y lo keda un bon cooperacion entre CAft y pais Aruba pa hunto logra banda di finansa duradero y prudente, keda mantene e balans continuamente pa tur hende mester beneficia di e desaroyo di nos pais, segun minister Geoffrey Wever.
“Cooperacion estrecho ta un instrumento necesario pa logra resultadonan concreto na beneficio di nos isla. CAft como partner importante den e desaroyo di Aruba ta duna conseho y recomendacionnan cu ta contribui na un finansa publico duradero, prudente y transparente”, segun ministro Geoffrey Wever.
