E Minister encarga cu Deporte sr. Dangui Oduber, lo bai trece un bida bek den e sector deportivo aki na Aruba cu pa 8 anja a wordo neglisha bou maneho di e gobierno anterior. E mandatario tin como meta pa stimula deporte pa di e forma aki stimula un bida y mente sano y activo bou di henter nos poblacion, principalmente bou nos hubentud.
E Minister di Deporte mes tawata un deportista hopi activo aki na Aruba y tin deporte na su curason. Cu esei e mandatario di Deporte ta sigura e comunidad deportivo y deporte en general aki na Aruba cu deporte lo no wordo neglisha mas. E Minister di Deporte ta trahando riba un plan integral pa cu Deporte na unda cu lo enfoca riba differente tereno den e sector di deporte. Den e cuadro aki lo bai enfoca riba entre otro profesionalisacion di nos sector di deporte, promocion di deporte riba tur nivel (escolar, recreativo y competitivo), mehoracion di accesibilidad di facilidadnan deportivo y conscientisacion riba e importancia di deporte pa nos salud. Un punto di accion cu tin e atencion di e mandatario ta e aumento y prioritisacion di fondo. Lo crea un Fondo Nacional di Deporte (FND) cu e meta pa atrae, canalisa y aloca na un manera transparente, husto y segun prioridad, recursonan financiero necesario pa sector di deporte. E prioridadnan lo ta basa riba e plan di maneho pa deporte. Un cos ta sigur, cu tur fondo lo wordo aloca den un forma balansa pa cada sport vereniging aki na Aruba, pero esaki lo bai a base di un maneho estricto.
Tur vereniging mester cumpli cu e requisitonan stipula pa gobierno pa bin na remarke. Veldnan di futbol y beisbol riba henter nos isla cu no a hanja e atencion ni mantencion necesario durante e ultimo 8 anjanan aki, lo bai hanja esaki. Differente veldnan di futbol y beisbol riba nos isla, lo bai hanja turf (yerba artificial). Na prome luga lo bai hasi full un inventarisacion y check status di tur veld aki na Aruba y despues di evalua cual di nan tin mas prioridad lo cuminsa traha riba esaki immediatamente. Loke ta regarda e fundacion lotto pa deporte, lo kier bai revisa henter e contract cu tin entre lotto pa deporte y Canadian Bank Note pa sigura cu e ta na ventaha di deporte en general aki na Aruba. Na final e mandatario ta manda e mensahe bon cla pa e comunidad deportivo aki na Aruba cu a yega ora pa rebiba henter e sector di deporte aki na Aruba en particular nos hubentud cu merece un bida y mente sano continuo.
