Minister Dangui Oduber y ATA a presenta e protocol di exit strategy di turismo na comision fiho di turismo na Parlamento

790

ORANJESTAD – Dialuna mainta Minister di Turismo Sr. Dangui Oduber hunto cu Minister di Labor Sr. Glenbert Croes y a reuni cu e comision fiho di Turismo na Parlamento di Aruba encuanto e strategia y protocol cu lo bay wordo uza pa “Jump Start” e sector turistico di pais Aruba. Sra. Ronella Tjin A Tjoe-Croes CEO di ATA tambe tabata presenta caminda e la duna un splicacion amplio na Parlamento riba e strategia cu lo wordo uza na momento cu Aruba habri su fronteranan.

Algun strategia y protocol cu a keda presenta na Parlamento di Aruba:

(1)          Na Airport lo bay instala camaranan special pa detecta temperatura (thermal camara) di e    pasaheronan cu ta drenta Aruba.

(2)          Den caso cu detecta un pasahero cu tin keintura lo hala esaki un banda y test e dibiaha na Airport mes cu un “rapid test kit” cu ta duna un resultado dentro di 1 ora y mei di tempo. E ta mas caro pero ta duna un mihor resultado cu e testkit di 15 minuut.

(3)          Ta bay tin un “checklist” cu preguntanan cu lo wordo haci na e pasahero door di miembronan di DVG na airport pa wak si e persona tin e sintomanan di COVID-19 y si esei ta e caso e persona lo wordo getest cu e “rapid test kit”.

(4)          Lo bay introduci un app di contact tracing cu lo facilita e trabou di DVG den e proceso.

(5)          ATA a prepara e Aruba Health and Happiness Code, esaki ta un certificacion pa tur e establicimentonan caminda nan ta demostra na e turista cu nan establicimento ta cumpli cu tur rekisitonan di COVID-19, manera un bon higiena y proteccion. Esaki lo bay bira un punto di mercadeo pa mustra e turista cu Aruba ta un destinacion sigur pa cu COVID-19.

Encuestanan haci door di ATA na biaheronan ta indica cu tin interes pa biaha pa Aruba ora habri e frontera. Minister Oduber a indica cu lo bay haci test di prueba na Airport y na Hotelnan pa indentifica e eficiencia di e plan di strategia aki. Tambe e mandatario a trece dilanti cu e plan cu e strategia y protocol aki a keda presenta na AHATA y tur stakeholders tambe y cu tur hende ta riba e mesun linea. Minister Oduber a menciona cu Aruba ta hopi mas mihor prepara cu ora e prome 2 caso di COVID-19 a yega Aruba.

Aruba tin un draaiboek, tin mas personal na hospital, tin mas capasidad di cuido intensivo y awor Aruba sa con y ki ora pa actua na momento cu nos cuido medico ta bou di presion. Finalmente Minister Dangui Oduber a menciona cu ainda Aruba no tin fecha definitivo pa habri frontera pero esaki lo sosode pronto ya cu ta finalisando e ultimo protocolnan necesario.