For di aña pasa december, a kita e director financiero di hospital, Theo de Kool. Na momento cu Raad van Toezicht a tuma e decision aki, a splica nan si nan tin suficiente base pa termina e contracto laboral di e director financiero, percura pa tin un backup plan.
A pidi pa tin un wervingselectie, percura pa busca un reemplasante pa de Kool, kende a wordo retira na aña pasa december y ya caba a cumpli un aña di esey.
Minister di Salud Publico, Dangui Oduber, ta lamenta esaki y e ta haya ta iresponsabel pa Raad van Toezicht no a yena e vacatura aki. Pa un organisacion di mas di mil trahado, un director financiero ta un funcion sumamente importante den henter e organisacion.
No na un ocasion, sino na varios ocasion gobierno a reuni cu nan, a splica nan di e necesidad y cada biaha ta puntra pakico nan no ta yena e vacatura aki.
Ta mesun caso cu tin cu e director medico cu ta sr. Cilie, kende na e momentonan aki ta e unico persona cu ta forma parti di Raad van Bestuur. Su contracto ta termina awo na december y na ningun momento a tuma un iniciativa pa busca un reemplasante. E minister ta kere cu e contracto di Cilie lo ta prolonga, aunke el a yega su edad di pensioen.
“Por mira e situacion cu tin na hospital, unda cu e situacion no ta den control. Cuido naturalmente ta garantisa y esey ta importante pa comunidad sa, pero e maneho no ta loke cu gobierno ta desea. Gobierno tin e vision pa reduci e wachtlijstnan y wachttijdnan. Pero e cooperacion di parti di hospital no t’ey y ta lamenta e iresponsabilidad cu e hunta di supervision tin cu bo no ta ni yena e vacatura di director financiero.”
Un aña a pasa y ainda no tin un persona y no a busca un reemplasante pa Cilie. Na e momentonan aki mester busca un director financiero. Na mes momento busca un reemplasanta pa Cilie. Ta yega e momento pa cada miembro di e hunta di supervision aki, reflexiona kico ta nan responsabilidad pa loke ta salud publico.
No reflexiona kico ta nan tarea pa haci pa gobierno di Aruba, sino kico ta nan tarea den nomber di e comunidad aki. Kico nan ta haciendo pa percura pa tin un hospital manera mester ta, cu ta funciona optimalmente pa percura cu e cuido por wordo garantisa na tur momento, pa tur e funcionnan clave ta yena y nan reflexiona pa si nan ta apto pa keda forma parti di e hunta di supervision aki.
Raad van Bestuur
E constelacion, conforme e statuut di hospital y tambe discuti den parlamento, caminda cu parlamentario de Meza a trece dilanti, cu e structura di hospital, no ta e miho.
AZV ta esun cu ta financia tur servicio di casi entre 180 y 220 miyon pa aña. E autoridad gobierno tin eyden ta masha limita, pasobra tin un hunta di supervision cu ta consisti di 7 persona, di cual gobierno tin dos kroonlid. No tin e balansa cu tin mester.
Por ehempel sindicato tin e deseo pa e contract di Cilie ta prolonga. Sindicato tampoco tin e deseo pa e hunta di supervision keda. Pero apesar di esaki no ta duna oido na sindicato. Sindicato kier un asiento den hunta di supervision. A pidi cooperacion na e presidente di e hunta di supervision, pa duna sindicato un asiento pa por tin e balansa tambe.
Con cu bay bin, hospital ta un organisacion di mas di mil empleado. Na momento cu tin un sindicato cu ta representa tur trahado, ta mas cu logico cu bo ta duna nan e representacion tambe den e hunta di supervision pa e decisionnan cu ta wordo tuma den nan nomber.
Apesar di e apelacion cu gobierno a haci, nan no ta duna oido na gobierno, no ta duna oido na sindicato. E specialistanan tambe a manda un carta den luna di april. E carta aki, dirigi na e hunta di supervision y raad van bestuur, por considere como un mocion di desconfiansa pa nan. Si ta pa nan no ta sigui traha cu ni raad van bestuur, ni e hunta di supervision bao di e circunstancianan aki y bo por mira cu desde april te cu awo, ningun accion concreto a wordo tuma di nan parti y toch ta lamenta esaki.
“Na fin di dia, bo kier un hospital cu nos tur, como pais, como ciudadano di e pais aki, ta orguyoso di dje. Ta un hospital nos tin. Bo kier un hospital cu ta funciona manera mester ta, pero lamentablemente esaki no ta e caso. Gobierno kier cambio, pero nan tambe tin cu coopera pa logra e cambionan cu tin deseo pa ta ehecuta.”
BIG Registratie
ARUBIG ta un proceso cu a cuminsa na momento cu e gobierno a sinta. A reuni cu tur stakeholders y asociacion di dokternan di cas, asociacion di specialistanan, Imsan, departamento di salud, departamento di inspeccion.
Tur esnan cu ta participa den cuido medico na Aruba, a splica nan cu esaki ta algo cu ta forma parti di e programa di gobernacion, pa reconoce tur dokter Arubiano cu a studia den region, sea cu ta na Costa Rica of Colombia.
Na e momentonan aki esey ta un di e problemanan cu nan no ta wordo reconoci y tampoco brinda, por ehempel si un medico general kier sigui specialisa sea na Costa Rica of Colombia, nan bin bek cu specialisacion, nan no ta wordo reconoci. Ley ta bisa cu ta reconoce solamente esnan cu a specialisa na Hulanda. Den esey a bisa cu kier un cambio drastico. Kier percura pa duna nan e reconocimento y e no tabata facil.
Tabata tin hopi resistencia di parti di dokternan di cas y specialistanan. Pero a splica nan cu e realidad di cuido medico na Aruba, no ta cu nos ta basa nos mes riba e BIG Registratie.
Semanalmente, no solamente Oduber, sino e ministernan prome cun’e, ta firma decretonan Ministerial pa laga dokternan sea di Venezuela, Costa Rica, Colombia, bin practica na Aruba y mayoria di pashentnan ta manda Colombia pa haya tratamento.
Pa e minister no tin sentido hiba un discusion pakico no por reconoce un yiu di tera bin traha, siendo cu ta manda pashentnan Colombia y practicamente e minister ta firma un decreto tur siman, pa un dokter di region bin traha na Aruba.
Na fin di dia, tur hende tabata di acuerdo. A yega na un consensus pa sigui ehecuta e proceso pa haci AruBig un realidad.
Mientras tanto a percura pa setup e registro. Ta percurando pa setup e instituto di calidad tambe. A traha riba e ministeriele regelingnan. A traha riba e LBHamnan cu tin cu manda Raad van Advies y si tur cana segun e planning cu tin, pa fin di e aña aki, e LB Ham-nan lo ta manda pa Raad van Advies pa por haya un conseho riba esaki y finalmente, si tur cos cana, pa e prome kwartaal di 2020, AruBig ta un realidad.
Recientemente a reconoce tambe pa prome biaha den historia, e mediconan cu posicion general di SVb. Ta prome biaha nan ta reconoci y a sigui un trayecto na Hulanda y tur e dokternan aki ta wordo recooci den AruBig.
AruBig ta bay ta un logro grandi pa nos pais, no solamente di gobierno sino pa cada un di e studiantenan aki, cada un di e Arubianonan aki, cu a nace aki, cu kier sigui studia, cu kier sigui specialisa, cu kier bin bek, contribui na salud publico, lo logra esaki pa prome biaha den historia.
Logicamente e ta tuma su tempo pasobra kier hinca un bon producto den otro. Por a cuminsa hopi tempo pasa, pero tin varios detaye cu ta cay riba dje den e trayectorio. Ta p’esey el a tuma un tiki tempo.
E minister ta convenci cu den transcurso di otro aña e por bira realidad caminda tur studiante, cu a studia den e region, lo ta reconoci y brinda e oportunidad pa sigui specialisa na Colombia, Costa Rica, Merca y Canada.
Ta e cuater paisnan cu ta cuminsa cu nan. Venezuela no ta cuminsa ainda, mirando e situacion cu tin eynan, pero e ta keda un posibilidad den futuro.
