Minister Dangui Oduber impresiona cu preparacionnan pa reapertura di Aeropuerto

Awe tardi Ministernan Evelyn Wever-Croes y Dangui Oduber hunto cu varios stakeholders den turismo a mira e trabounan cu Aruba Airport Authority a realisa pa prepara nos aeropuerto pa ricibi bishitantenan entrante otro siman. A tene cuenta cu tur e reglanan di distanciamento social y di higiena. Ademas ta preparando un centro pa tur pasahero haci e Covid-test asina cu nan yega Aruba si nan no a hacie caba prome cu nan a biaha.

Minister Dangui Oduber a gradici gerencia y staf di AAA pa e trabou grandi haci y pa tur e preparacionnan pa ricibi nos bishitantenan. A probecha e presencia di AHATA, ATA y AAA pa gradici nan pa nan cooperacion y comprension den e tempo duro tras di lomba y a sigura nan cu Gobierno di Aruba ta determina pa lanta e pilar economico bek, hunto cu e partnernan di e sector turistico.