Tin dos hotel cu Gobierno ta enfocando aworaki riba nan. Uno ta esun na San Nicolas y e otro banda di Strandpolitie. Segun Minister di Turismo, Dangui Oduber, pa loke ta e hotel banda di Strandpolitie, mas cu un aña pasa, a firma un MoU entre gobierno y St. Regis, cual ta un cadena hopi prestigioso y upscale, cu sigur lo trece un balor agrega na Aruba su turismo.
E tereno ta duna den erfpacht caba y si tur cos cana segun planning di e grupo di inversionista aki, e groundbreaking por tuma luga ainda pa e aña’ki. E ta un proyecto di 140 camber hopi luhoso, super prestigioso. Esaki ta conforme e maneho di gobierno tambe.
Na momento cu e gabinete actual a drenta e gobernacion, a hereda un situacion cu a duna hopi tereno caba na diferente inversionista pa nan bay ehecuta proyecto. Pero esaki ta un di e proyecto cu e gobierno ta kere firmemente aden.
Si mira tur e acomodacionnan cu tin na Aruba, St. Regis ta wordo considera como esun mas luhoso. Tin Marriott, Hyatt, Hilton, Ritz Carlton, cual ta un di esunnan mas prestigioso na e momentonan aki. St. Regis ta considera di ta riba Ritz Carlton. Nan ta un grupo cu a inverti caba na Aruba, cu a percura pa deliver e proyecto di Ritz Carlton. Si tur cos cana segun planning, e aña aki e proyecto aki lo cuminsa. E construccion lo tuma dos aña di tempo. “Importante den esaki ta cu nan busca trahadonan local. Esey ta e exigencia di gobierno, pa nan traha hunto cu EPI, cu Universidad di Aruba, pa nan cuminsa leid op tur e studiantenan cu ta den e sector di horeca, prepara nan por haya trabao. Nos kier pa crea e cuponan di trabao pa nos propio hendenan, nos localnan.”
E mandatario a duna e ehempel di Hyatt Placa, cual ta un proyecto siendo den oposicion nan a yega di critica. “Den oposicion nos tabata hopi critico riba e proyecto aki. Tabata hopi sceptico. A bisa cu kier productonan di calidad, kier hotelnan di calidad y e tempo ey tabata sceptico pasobra ta bisa cu ta un airport hotel ta bay bin, bo no sa kico nan ta bay entrega.” Pero su pensamento a cambia despues cu recientemente a haya un invitacion pa bay cana den e hotel aki, pa mira kico ta e producto cu nan a presenta, y e ta sumamente contento di e resultado final di e proyecto Hyatt Place. El a constata cu e ta un concepto diferente. E ta un balor agrega pa Aruba. Den e caos di Hyatt Place, e GM ta un Arubiano, y 42 di e 43 trahadonan ta Arubiano y e mensahe cu gobierno kier transmiti pa comunidad ta cu lo bay bin cu proyectonan cu lo beneficia e comunidad y e punto di salida ta cu nan mester busca localnan pa traha den nan hotel.
Gobierno no kier pa importa hende di afo. Na Aruba tin suficiente hende cu ta buscando trabao na e momentonan aki y tur e hotelnan aki mester por acapara e demanda cu tin pa trabao aworaki.
Boutique hotel
E grupo di De Molen tambe ta interesa den traha un boutique hotel. Segun e mandatario, e grupo di De Molen tin deseo di cambia nan concepto di haci negoshi. “Gobierno tambe tin e deseo ey. Ta prefera un boutique hotel eynan cu un nightclub cu ta trece varios problema cun’e. Por bay bek den tempo caminda cu tabata tin tiramento eynan. Constantemente tin bringamento eynan. E ta den un zona turistico, den High Rise area. Gobierno ta prefera un desaroyo hotelero eynan.” E grupo aki a presenta un proyecto di boutique hotel, cu sigur ta un upgrading pa e area. “No kier hotelnan grandi mas. No lo kier hotel den gran cantidad di camber, sino hotelnan di entre 50 y 60 camber.” E mandatario a menciona cu tin cu tene cuenta semper cu e capacidad di carga cu e pais por absorba, den e caso aki nan a cumpli cu e vision y maneho di gobierno pa presenta un boutique hotel. Awo ta den deliberacion cu minister di Infrastructura, Otmar Oduber, p’asina por yega na un acuerdo cu e grupo aki, pa bin cu un boutique hotel hopi bunita eynan, cu sigur lo trece un cambio den henter e area. E ora ta elimina un club nocturno cu a ocasiona hopi problema den pasado y cambia henter e modelo di haci negoshi, pa un hotel e ora.”
Tierra del Sol
For di den gobernacion anterior, Tierra del Sol no a haya e cooperacion necesario. Nan tambe tin interes pa inverti den un hotel pa asina por sobrevivi cu e proyecto di Tierra del Sol.
Na momento cu a drenta den gobierno, a hereda dos proyecto cu tabata cla pa cuminsa. Tabata e proyecto di Tierra del Sol y esun di Eagle Beach. A hereda un proyecto di 600 camber, all-inclusive. E ministernan a negosha cu e grupo, bisando cu no kier mas hotel all-inclusive p’abao di Aruba. P’ariba tin excepcion pa proyectonan all-inclusive.
Den un proceso di negociacion a yega na un acuerdo pa scale down e cantidad di camber, pa un hotel di 200 camber, segun a compronde ultimo, y esun di Tierra del Sol tambe ta den proceso di negociacion.
Esey si no por duna indicacion ainda ki dia esey lo cuminsa. Pero loke por a compronde for di e doñonan di Tierra del Sol, cu si no bin un grupo cu ta bin cu un proyecto hotelero di tiki camber, e proyecto no lo sobrevivi, e ora nan lo mester cera Tierra del Sol y manda 80 trahado cas. Di hopi aña nan ta den e proceso aki. For di gobernacion anterior caba nan a sinta cu gobierno pa nan presenta e proyecto aki, cu ora a drenta gobierno, a hereda un situacion cu en realidad tabata un hecho cumpli cu no por a haci nada mas cu e proyecto. Te ainda gobierno no tin claridad si e proyecto aki ta sigui y si e ta sigui mes, ki dia esaki lo sigui, segun minister Dangui Oduber.
