Minister Dangui Oduber: E aña aki lo cuminsa desaroya “Port City”

Minister Dangui Oduber a informa cu e proyecto “Port City Aruba” lo cuminsa e aña aki ehecutando su vision pa cu turismo y desaroyo. A considera diferente aspecto, pensamento y opinion di comunidad. E obhetivo ta pa converti e area di Port City den un area atractivo y vibrante pa Oranjestad, door di combina uzo di recreacion, residencianan y negoshinan.

Port City lo bay conecta hende, e zona urbano y e ciudad di Oranjestad y tambe nos lama Caribense. E plan ta consisti di un area di aproximadamente 20 hectar y lo inclui un park hopi grandi accesibel pa publico.

Inversion total di e proyecto aki ta calcula na 550 miyon Dollar cu un duracion di 10 aña, di locual 500 miyon lo ta inversion di inversionista y contratistanan priva. Lo bin cu Boutique hotels/lifestyle hotels, un convention center, un boardwalk, areanan pa publico, hopi open space y food and beverage.

Minister ta sigura cu e proyecto lo complementa Caya Betico Croes y no competi cu Caya.

Minister Dangui Oduber kier atrae turistanan afluente. Pa por atrae e nivel di turistanan asina mester di infrastuctura di calidad, mester proyectonan di calidad, mester tin servicio di calidad y mester un desaroyo sostenibel pa crea e balansa necesario entre desaroyo y calidad di bida. Comunidad tambe mester por sinti efecto di e desaroyo aki.

Minister Dangui Oduber kier brinda oportunidad na comerciantenan local pa desaroya e area. Prioridad ta pa placa keda circula den nos economia y nos localnan haya oportunidad considerando e hecho cu ta desroyonan cu por financia localmente mes. E proyecto lo genera hopi empleo, lo crea entrada pa gobierno, lo stimula economia y contribui na un forma positivo na nos GDP cu ta importante.
Minister Dangui Oduber a confirma cu ta preparando e proceso di destaho publico y pa fin di aña ranca sali cu e proyecto aki.