Minister Dangui Oduber: Pabien na tur nominado y ganado di AHATA Exellence Awards

Minister di Tursismo Y Salud Publico Sr. Dangui Oduber hunto cu colega Minister di Labor Sr. Glenbert Croes tabata presente na AHATA su “Excellence Awards 2021”. E bunita ceremonia anual a tuma lugar diahuebs den e ballroom di Hyatt Regency Aruba resort. Den e ceremonia aki ta honra e personanan cu ta sobresali den servicio den e sector turistico. E sector turistico ta sostene 88% di e economia (GDP) di Aruba. 

Despues cu Aruba a conoce un caida drastico den turismo door di e pandemia. Awor den e fase di recuperacion di nos turismo, servicio ta un parti esencial y esaki no por ta posibel sin nos embahadornan di turismo. E elemento di suma importancia pa e bienestar di nos economia ta e nivel di servicio personal cu nos ta brinda na e turista. Pesey e premio di AHATA’s Excellence Awards ta di sumo importancia, según e mandatario. 

Tabata tin 38 nominada y mester bisa cu tur tabata un ganador ariba nan mes, mirando cu nan ta wordo escohi for di mas di 10,000 empleado den e sector aki.

Minister Dangui Oduber ta manda palabranan di felicitacion y aprecio na tur e nominadonan y e ganadornan. Cada un di bosonan ta contrubui grandemente cu e sector turistico, brindando servicionan di calidad na nos bishitantenan.  

Den nomber di país Aruba e mandatario a felicita AHATA su team pa haci e evento aki uno exitoso. Tambe danki na Hyatt hotel pa haci nan ballroom disponibel, na Tropical Bottling Company, De Palm Tours, Gianni’s Group y CMB pa nan contribucion haci na Turismo.