Minister Dangui Oduber ta lamenta profundamente cu Sindicato SEPPA ta hunga politica barata y ta instiga trahadonan di GKMB sabiendo cuanto oido a duna e sindicato riba e tema specifico aki. “Nos como Ministerio a atende preocupacionan di GKMB for di aña pasa caba! Pa 8 aña no a dedica tempo ni placa pa GKMB pero mas cu logico cu SEPPA no tawata activo pa 8 aña”, asina Minister Dangui Oduber a reacciona.
“Diripiente despues di gobernacion di AVP e sindicato a resusita. Nos como Ministerio a percura pa presupuesta placa pa cumpra auto. Nos a atende cu tur bevordering cu tawata tranca. Nos lo presupuesta placa pa cumpra material y uniform. E unico peticion pendiente ta e gevarenpremie. A busca conseho na DRH pero e conseho a bin negativo. Mescos cu GKMB ta pidi, Polisnan, Warda nos Costa y otronan tambe a pidi”, asina e Minister a reacciona.
Kiermen ora e mandatario tuma nota di preocupacionnan manera expresa, e ta puntra su mes si SEPPA ta informa su miembronan na GKMB cuanto Gobierno a haci caba pa e unit aki. E Minister a caba di contesta un carta recientemente pa bolbe informa SEPPA riba nan peticionan.
“Nos tey pa sirbi interes di nos diensten, nos ta duna oido na tur sindicato, nos ta atende na un manera serio y responsabel cu tur problema y 
preocupcion pero nos no ta traba bao menasa y presion. Nos semper ta habri pa dialogo y pa informa comunidad y tambe SEPPA y nan miembronan riba tur loke ta haciendo pa den e caso aki pa e unit GKMB”, asina Minister Dangui Oduber a termina bisando.
