Aunke no tin ningun update, pais Aruba semper ta bon prepara pa loke ta e fenomeno di coronavirus. Aruba tin hopi profesional cu tin e conocemento, cu tin e experiencia y tin e experticio pa yuda e pais pa tuma tur medida di precaucion.
Segun Minister Dangui Oduber, Departamento di epidemiologia y malesanan contagioso, tin varios experto epidemiologico cu ta sigui e trend y reglanan internacional di IHR y tambe WHO, cu ta stipula cierto proceduranan cu tin cu sigui na momento cu algo asina, manera coronavirus wordo declara oficialmente un epidemia mundial, como pais bo tin cu sigui e reglanan aki.
Tin cu percura pa ta bon prepara. Pesey diadomingo ultimo a tene un rueda di prensa. No ta e prome, sino e di cuater of ta di cinco rueda di prensa, cu na un manera transparente y habri, a informa kico tur a wordo haci y kico ta e medidanan di precaucion cu a tuma.
Ta pesey a informa comunidad cu na hospital caba tin varios camber di isolacion si en caso tin un persona cu tin e sintomanan, ta wordo isola mesora.
Tin diferente zonanan caba cu a wordo apunta como zonanan di cuarentena, pa e malesa no plama. Diadomingo tabata tin e caso cu cuater persona di nacionalidad Hulandes cu a biaha pa China a yega Aruba. Tabata tin comentario cu pakico Aruba a laga nan drenta. Segun tur tratado, bo no por prohibi un residente di bin bek su pais. Bo ta wak noticianan internacional, manera Hulanda mes, ta busca su residentenan for di China, pa trece nan bek Hulanda. Ta pone nan den cuarentena si. Esey ta loke a haci.
Noticia positivo sigur ta cu ningun di e cuater personanan aki ta contagia cu coronavirus. Ta monitoreanan tres biaha pa dia. Controlnan ta wordo haci. Nan ta wordo gecheck si nan tin un of otro sintoma. Pero te na e momentonan aki tin indicacion cu nan tin e virus. Nan a bin di un zona di China, cu no tabata tin ningun persona contagia cu e coronavirus.
Nan a pasa Amsterdam, nan a wordo gescreen eynan, y controla. Despues cu KLM nan a bin Aruba y porcierto KLM tambe a cancela tur su vuelonan pa China y for di China. Hulanda ta wordo uza como un di e Gatewaynan pa China. Nan por pasa ainda naturalmente via Merca, pero Merca tambe a limita e cantidad di vuelonan pa y for di China.
Noticia positivo ta cu nos no mester crea panico sin ta necesario. Aruba ta bon prepara y ta siguiendo tur proceduranan cu mester sigui. Si en caso haya un situacion cu tin un persona cu tin e sintomanan aki, ta tuma medidanan. Aunke na e momentonan aki no ta e caso.’Tin contacto cu e minister di salud publico di Corsou, Camila Romer, pa monitor e situacion na Corsou, mirando cu tin hopi trafico aereo entre Aruba y Corsou. Eynan tampoco no tin e caso, ni na Boneiro.
E otro islanan St. Maarten y e resto di Caribe Hulandes, no tin ningun caso. Ta noticianan positivo, sinembargo tin cu pone den perspectiva coronavirus, cu e ta un virus cu berdad por ocasiona morto. Den cierto caso cu tin inmunidad abao.
Si haci un comparacion cu infuencia, cual ta un griep fuerte, yama N1H1 virus. Na Merca el a mata for di october te cu comienso di februari, mas cu 10 mil hende. Coronavirus awor aki segun ultimo cifranan, tin rond di 530 persona morto na China. Pafo di China no tin ningun caso segun e minister cu a wordo raporta. Tin ocho caso confira na Merca. Tin cu monitor e situacion aki tambe.
Aruba ta biba di turismo, pesey tin cu monitor e situacion hopi di cerca. Ta un situacion cu dificilmente bo por controla, si un persona ta bin cun’e si of no, pasobra tin un tempo di incubacion di dos siman y den e dos simannan aki e persona por tin e virus, contagia otro, sin e persona mes sa cu e tin e virus, mirando cu e no tin e virus ey despues di dos siman.
Despues di dos siman e ta cuminsa sinti dolor di garganta, tosamento, problemanan di respiracion, keintura halto, dolor di cabes. Esakinan por ta un indicacion cu e por ta coronavirus, no necesariamente. E por ta un seasonal flu, e por ta e por ta un influenza. E diferencia pakico coronavirus a bira un panico mundial, ta pasobra no tin un vacuna pe. Pa influenza si tin vacuna. Na e momentonan aki, ultimo noticianan cu a haya di WHO y IHR ta cu China ta trahando riba un vacuna cu ta wordo getest na e momentonan aki riba bestia na China, pa wak si esaki por duna e resultado cu tur hende ta buscando, cu tin un vacuna pa loke ta e virus, pa asina contene cu e virus ta sigui plama.
Comprension di pasaheronan
Na e momento cu e avion a baha, ya caba e piloto a avisa tur hende abordo cu tin persona cu a sali for di mainland China, a yega Aruba. A duna tur cooperacion cu salubridad publico y expertonan pa asina haci e screening abordo, haci e control necesario. Nan a brinda tur cooperacion pa hiba nan den un area cu ta isola, cu no tin contacto ni cu contacto, ni amigonan of bisiña, pa asina si en caso cu nan tabata tin’e, nan sigui contagia. Pero manera ya indica, ningun di e cuater personanan aki no tabata tin sintoma y ta goza di un bon estado di salud.
Den e caso aki ta bon mes na Aruba no tin caso confirma di coronavirus.
