Aunke cada biaha ta tende parlamentario Ricardo Croes expresa y tira palabra den direccion di actual gobernantenan of parlamentario contra marihuana recreacional, asina mes e mandatario di Salubridad, Dangui Oduber ta para duro cu Marihuana recreacional cu humamento no ta conta cu su sosten.
El a bisa caba y lo keda bise tur biaha. Segun Dangui Oduber, nos tin un acuerdo di gobernacion y e acuerdo aki ta papia di legalizacion di marihuana medicinal. E minister ta responsabel tambe pa e maneho di adiccion. E mandatario tin contacto cu Fundacionnan cu ta trahando duro pa asina bringa e presencia di droga cu ta causando daño. Marihuana a drenta hasta scolnan basico y scolnan secundario.
Maestronan ta preocupa y tambe mayornan cu a descubri e problema cu marihuana ta treciendo pa e muchanan. Puntuahe ta bayendo atras pa motibo di e uso y presencia di marihuana na scol. Hasta instancianan ta cuminsa test muchanan cu tin sospecho di uso di droga na scol y 20% di nan ta confirma cu marihuana den nan sanger. Pesey mes e minister a bisa caba cu e no ta sostene aprobacion pa humamento di marihuana y ta para pa e acuerdo di gobernacion pa legalizacion di marihuana medicinal.
