Minister Dangui Oduber: A reuni cu CEO y management di ATA

Minister di Turismo Dangui Oduber a caba di huramente dialuna atardi y a cuminsa mesora cu trabounan pa sigui recuperacion di nos turismo. Di e forma aki a reuni cu CEO di ATA sra. Croes y tambe miembro di management sra. Vis riba e maneho y vision pa e siguente 4 añanan di turismo.

Tabata hopi importante pa riba e promer dia di trabou comparti esaki cu ATA pa por percura pa e maneho aki wordo ehecuta pa ATA pa e siguente periodo di gobernacion. Durante e encuentro aki, e minister a comparti cu ATA unda e kier mira turismo. Minister Oduber a informa cu e lo kier percura pa sigui atrae turistanan affluente, turistanan cu tin un entrada annual di minimo $150.000. E enfoke lo ta dirigi riba e asina yama “high value” customer. Esun cu tin e capacidad pa gasta den nos economia. E vision di crecemento ta dirigi riba low volume high impact.

Minister Oduber a splica cu kier sigui mira desaroyonan pero desaroyonan chikito, brand names y cu tin menos impacto riba nos naturalesa y capacidad di carga. Aruba ta den un posicion awor aki di luho den sentido, ta keda na nos cual desaroyo nos kier, cua brand nos kier y cuanto camber.

Pa mantene Aruba competitivo lo tin diferente proyecto pa mehoracion di producto Aruba.

A elobora tambe den ki formanan por maximalisa e entrada cu ta wordo genera pa turistanan pa pais Aruba.

E reunion aki tawata uno fructifero y minister Oduber ta cla pa sigui riba recuperacion di nos turismo. Turismo ta nos unico pilar economico y ta keda e driver principal di nos economia.