Awe un biaha mas riba djadumingu Minister di Enseñansa, Siensia, Kultura i Deporte (ESKD) Sr. Steven Croes a bishitá otro baluarte mas di Kòrsou. Manera ya ta kustumber kaba Minister Croes ta dediká parti di su djadumingu pa duna atenshon ku nos baluartenan den kultura i deporte.
Ayera 3 di yanüari djadumingu mainta Minister Croes a hasi un bishita na un gran músiko kompositor kantante, e distinguido sr. Cedric Ridderplaat mihó konosí komo “Ced Ride”
Durante di e kombersashon Ced Ride a deleitá minister kontando di su largu trayektoria den farandula, kaminda el a skibi, komponé i kanta varios kansion ku awe ta parti di nos kultura i historia i pa semper den nos memoria. Kansionnan manera “Mi Pais”, “Doktor” i “Butchi Fil”.
Minister Croes tabata kurioso pa sa di unda e nòmber “Ced Ride” ta bini. Hariendo Ced Ride a kontest’é ku ta su señora mama a dun’é e nòmber artístiko ei ku ta derivá for di su nòmber ofisial.
Tabata un mainta ameno, Minister Croes a keda enkantá di a skucha e historia interesante di e gran baluarte aki, pero tambe Sr. Ced Ride i su señora tabata honrá di minister su bishita.
Minister Croes lo sigui dediká parti di su fin di siman pa bishitá nos baluartenan riba tereno di kultura i deporte pa asina duna nan atenshon i rekonosementu. Di e forma aki alabes e ta mustra su interés pa nos kultura i deporte i stimulá su vishon pa nos siña nos muchanan fo’i chikí ku kada hende tin su propio talento i ku TUR talento ta mes importante, pues di igual balor.
