Minister Croes: Pa tarifa di awa y coriente keda abou e rumbo ta LNG y hydrogen

Miembronan di Parlamento di Aruba tabatin e oportunidad pa realisa un bishita di trabou na WEB. Na e ocasion Miembronan di Parlamento a ricibi presentacion, y tabatin e oportunidad pa haci pregunta tocante e maneho y vision di e compania. Minister Glenbert Croes ta dirigi palabra di gradicimento na e liderazgo di Parlamento, den persona di Edgard Vrolijk conhuntamente cu staff, Griffier y miembronan di Fraccion di MEP y Raiz den Parlamento cu a haci uzo di e oportunidad pa wordo bon informa.

Minister Croes a splica cu esnan cu a asisti e presentacion na WEB a ricibi informacion di henter e vision a termino largo di transformacion energetico y meta pa tarifa di awa y coriente. Tambe nan a ricibi informacion di locual ta haciendo pa tarifa di awa y coriente keda abou y e rumbo pa LNG y hydrogen, teniendo na cuenta e cuido di medio ambiente.

‘Ta gradici e delegacion di Parlamento cu si a asisti e presentacion na WEB, y haci uzo di e posibilidad y autoridad di Parlamento como e organo mas halto den nos sistema democratico constitucional. Asina ta sigura cu como representante di pueblo ta haya tur informacion pa sigura cu ta riba mesun pagina, rumbo pa recuperacion economico di nos Pais y transformacion di nos Pais. Cu e meta pa haci Aruba un mihor Aruba pa e generacionnan cu ta sigui despues di nos’, Minister Croes a expresa.

Terminando e mandatario a gradici un bes mas tur cu a asisti e reunion y tambe WEB pa nan transparencia, profesionalismo y amor y dedicacion cu cual nan ta traha pa Aruba y cu den tur honestidad a percura pa suministra informacion cu representantenan di pueblo.