Minister Chris Romero tin atencion pa bus di Arubus cu a pega candela

Un hecho lamentabel y alarmante a tuma luga diabierna den oranan trempan di mainta, unda cu un bus di Arubus a pega candela sopresivamente ora cu e tabata riba su ruta acostumbra. Afortunadamente e bus no tabatin pasahero den dje na momento di e sucedido. E chauffeur a sufri un herida leve na su man ocasiona pa su impulso di purba paga e candela, ora cu esaki a cuminsa origina. E chauffeur lo recupera pronto di e herida na su man, pa bolbe na su actividadnan regular aki poco tempo.

Inmediatamente despues cu e sucedido aki, e Minister di Transporte, Chris Romero, a pidi pa haci un investigacion exhaustivo di e hecho pa asina saca afo kico tabata e causa cu e bus pega candela repentinamente.

Tambe, Minister Romero a pidi pa aumenta e medidanan di siguridad di tur bus door di inspecciona nan cuidadosamente prome cu subi caminda. E integridad fisico di tur usuario di nos transporte publico mester ta e prioridad principal pa Arubus, y como tal e compania ta trahando diligentemente pa tur cliente por sinti trankil y sigur ora di haci uzo di nan servicio.

Mirando e situacion comprometedor di e flota di bus cu Arubus ta conta cun’e actualmente, algun tempo atras Minister Chris Romero a instrui pa ordo un cantidad di bus pa asina rehubenece e flota actual. Den corto tempo lo cuminsa remplasa e busnan bieu cu tin aworaki, cu busnan mas nobo y eficiente pa asina cumpli cu e demanda di transporte publico cu tin na Aruba.