En conexion cu su bishitanan na e diferente agricultornan local, Minister di Sector Primario, Chris Romero, a pasa na e produccion di pisca ‘The Family Farm Aruba’, situa na Wayaca. Fish farming ta un otro area den agricultura cu ta creciendo na Aruba. Minister Chris Romero ta hopi interesa den dje, esta e tecnica dirigi na fomenta reproduccion y cria di pisca y demas cuminda di lama.
‘The Family Farm’ ta opera pa famia Bosch y ta situa na Sero Biento. Despues di a opera pa algun aña na Sint Maarten, pareha Bosch a dicidi di bin lanta nan produccion di pisca aki na Aruba. Teniendo na cuenta cu Aruba su ubicacion geografico ta haci cu e probabilidad pa horcan ta hopi abou, famia Bosch a dicidi di bin construi nan ‘fish farm’ aki. Experiencia amargo di pasado, unda cu horcan a destrui nan produccion di pisca, a incentiva nan mas ainda pa construi nan ‘fish farm’ na Aruba e aña aki. 
Actualmente ‘The Family Farm’ tin un instalacion cu ta produciendo pisca caba, cu e meta pa den futuro produci pisca na un escala mas grandi pa cumpli cu e necesidad local.
Den e vision di Minister Chris Romero pa Aruba yega na ta mas independiente pa loke ta cuminda, ta realisando diferente sondeo den e sector di agricultura local. Di e manera aki kier cuminsa incentiva nos agricultornan pa nan comercialisa nan producto na nivel local y cu pensamento di por yega na exportacion den futuro.
