Recientemente Minister di Transporte, Comunicacion y Sector Primario, Chris Romero, a bishita Direccion di Asuntonan di Telecomunicacion (DTZ), pa personalmente mira e infrastructura nobo di ICT cu e departamento a haya. A inverti mas di 400 mil florin den computer y muebles nobo pa e departamento cu ta regula radio, televisionnan y tur aspecto di telecomunicacion riba nos isla.
DTZ ta un departamento cu durante decadanan no a haya su debido atencion for di e Gobiernonan anterior, asina Minister Romero a duna di conoce. Y cu ta pesey el a pone como un di su metanan pa modernisa DTZ, como un Departamento di importancia vital den e mundo moderno den cual nos ta bibando awendia.
A remplasa e servers bieu, cu ta data for di aña 2000 pa servers di aña 2019. A modernisa tur computer cu tabata opera riba e sistema Windows XP, pa computer ekipa cu Windows 10. E renobacion di e infrastructura di ICT aki ta haci posibel cu DTZ por digitalisa, automatisa y realisa proceduranan mas eficiente y cu ta cuadra cu e maneho y vision di Minister Chris Romero.
Sidney Tromp, hefe di Departamento Tecnico di DTZ, a haci un demostracion di locual e sistema nobo di grabacion di radio y television por haci. Tambe a mustra Minister Romero e diferente aparatonan cu DTZ ta uza pa haci supervicion y nan importancia pa cu control riba cumplimento di e leynan di telecomunicacion na Aruba.
Minister Romero a keda satisfecho di mira e adelanto cu finalmente a trece pa DTZ.
