Tocante e cambionan cu ta tumando luga den e maneho di Arubus, Minister Chris Romero tambe a duna di conoce cu aparte di ta buscando un Director(a) nobo, tambe lo bin cu busnan nobo.
Di e manera aki por sigui brinda servicio di transporte publico regularmente y segun plan. Di igual manera Minister Romero a indica cu e busnan nobo ta aproba caba den e presupuesto 2018 y cu e fleta aki cu lo selecta, lo keda di e mesun compania pa e añanan binidero.
Pa haci e trabou di e mecaniconan di Arubus mas facil y efectivo, a idea e plan pa keda busca fletanan di bus di e mesun marca y hasta model. Di e manera aki e mecaniconan lo keda familiarisa cu e tipo di motornan y lo mester keda capacita pa e mesun vehiculonan aki.
Aruparking y Arutram
Pa loke ta Aruparking y Arutram, e companianan aki tambe lo conoce cambio y mehoracion for di ora cu e Director(a) nobo keda instala. Minister tin plan cu pa 1 di januari 2019 e companianan estatal di transporte lo conoce e maneho y plannan nobo definitivo. E titular di e cartera di Transporte tambe a duna di conoce cu den e maneho nobo pa cu Aruparking ta encera cu lo bin cu campañanan di conscientisacion pa e consumidor. Esaki cu e meta pa educa nos ciudadanonan di e manera corecto con pa parkeer den nos centro di ciudad.
