Minister Bikker uzando civilnan pa investiga Cuerpo Policial Aruba

Ta parce cu Polis ta bon pa investiga tur hende, pero ora cu ta un problema interno, Minister Andin Bikker ta recori na un compania priva estableci na Corsou, pa bin investiga maniobranan financiero cu supuestamente ta bayendo robes den su mesun Cuerpo di Polis. Cu esey e mandatario ta demostra claramente di no tin confiansa den nos mesun poder hudicial y ta prefera opta pa civilnan sin ningun sorto di autoridad (bevoegdheid), por drenta investiga Polisnan cu si tin poder hudicial nan tras.

Cuerpo Policial a hay’e ta habri buki y mustra documentonan confidencial y wordo interoga dor di civilnan, contrata pa Minister Bikker. E maniobra aki no ta cuadra di ningun manera y ta demostra un falta di respet na e departamento di BIV y Landsrecherche, cu si ta autorisa pa investiga y eventualmente persigui empleadonan publico cu no ta cumpli cu ley y maneho estableci.

E sistema hudicial di nos pais ta hinca di tal forma cu e poder di investigacion ciudadanonan ta den man di Cuerpo Policial Aruba, cu ta resorta pa e parti di personal bou di Ministerio di Husticia pero cu ta duna cuenta na Procurador General den e parti di investigacion penal. E ultimo aki ta dicidi independientemente locual ta investiga of no. Decisionnan di Procurador General y Ministerio Publico semper ta suheto na supervision y por wordo huzga dor di Corte Comun di Caribe Hulandes.

Recientemente Ministerio Publico a purba haci tur forma posibel pa convence Corte cu nan ta traha imparcial y sin influencia politico. Sinembargo, tur dia bay ta presenta asina tanto evidencia di cual publico por haya e impresion y hasta e percepcion cu e realidad por ta diferente. E prioridad di nos poder Hudicial hopi biaha ta confronta cuestionamento di publico, cu ta puntra su mes si ta e Fiscalnan mes ta opta pa cana e caminda ey of ta haya ordo di ariba.

Den e caso specifico den Polis, for di Cocolishi ta bin ordo por ehempel pa investiga medionan di comunicacion cu ta scucha radio di Polis pa sa unda tin accidente. Pero na mes momento falta 1.3 miyon florin na bala (municion) den e organisacion policial cu t’ey como ehempel di integridad na nos pais. Minister Bikker ta opta, pa enbes di hinca e asunto serio aki den man di Ministerio Publico pa investiga ken a cobra sin entrega of cua empleado publico a participa den corupcion cu fondo publico, ta opta pa bira lomba y eventualmente laga civilnan investiga e departamento di “bedrijfsvoering” den Cuerpo Policial Aruba. Ta mustra cu e radionan ta mas importante cu ambtenaarnan cu supuestamente ta regla pa previlegia companianan pa ricibi pago mesora sin cu a cumpli cu entrega e producto cu a cumpra.

Awor henter siguridad nacional di nos pais ta bou presion, pero sin por haya nada pasobra e posibel sospechosonan awe ta coordinador di Prome Minister y a bira “intocabel” pa Ministerio Publico. E maneho aki di Procurador General ta percura pa un percepcion diferente di comunidad riba maneho hudicial di nos pais. Eror tras di eror ta demostra un formula di traha den cual e mannan politico ta hopi cerca banda di esun “imparcial” di e defensornan di ley!