E situacion na Venezuela y e Tratado pa asilo di aña 1967 ta demanda hopi atencion di Gobierno. Ayera Corte basicamente a dicidi cu 13 di e 14 stranheronan ilegal cu yega tera recientemente for di Venezuela por bay den libertad cu meldplicht si nan aplica pa asilo. Esaki den luz di e Tratado menciona y e ley di aña 2009.
Mirando e desaroyo ey y respetando nos estado di derecho, Gobierno a dicidi pa acelera e proceso di desicion riba peticionan di asilo pa den un tempo corto, tuma un desicion riba e peticionan, ya cu mayoria biaha ta resulta cu e stranhero no tin derecho riba asilo. Hecho ta cu hopi di e ilegalnan aki, ora nenga nan, ainda ta apela y di e forma aki recuri na e procedura pa purba alarga nan estadia na Aruba.
Na mes momento e proceso pa cambia e ley di aña 2009 lo finalisa e siman aki. Recientemente Gobierno a haya e conseho oficial di Raad van Advies.
Ademas, Minister mr. Andin Bikker a dicidi cu ta designa centro di Warda nos Costa, banda di kazerne di Brandweer na Aeropuerto, como e sitio unda tur esunnan cu ta den proceso di asilo mester keda obligatoriamente (cera) pa warda contesta di Gobierno riba nan peticion. Esey ta nifica cu si un persona yega na Aeropuerto y pidi asilo politico, cu e lo permanece na e centro mientras ta evalua su peticion pa asilo den un procedura di tempo corto. Si mester resulta cu e stranhero no tin derecho riba asilo, lo deport’e mesora.
Cu e maneho nobo aki, Minister Andin Bikker kier sigura cu stranheronan no ta pensa cu por yega Aruba na dozijn y pensa cu si pidi asilo cu nan tin garantia di un estadia “forsa” di mas o menos 1 aña na Aruba. Esey tabata e tempo cu lo a dura pa haya contesta, e tempo pa bo apela, pa bolbe haya contesta y pa bandona nos isla. Cu e procedura nobo, e peticionario lo haya un contesta den dos dia maximo, e lo por apela berdad y bolbe haya un contesta mesora. Di eynan sea e ta haya un permiso pa keda biba na Aruba y por traha of e tin cu bandona nos isla mesora.
Kisas ta bon pa aclaria cu tin dos forma pa pidi asilo. Esunnan cu pidi asilo na frontera ora yega Aruba den forma legal, nan ta yena un peticion oficial y por warda contesta na Aruba y por traha y permanece aki. Esunnan cu no a pidi asilo na frontera, por a keda Aruba pero no por a traha. Claro cu e tendencia ta pa yega Aruba na grupo grandi y purba burla di e sistema. Cu e maneho nobo di Minister Bikker, ta frena e tendencia aki y aunke di un banda ta brinda ayudoi humanitario na e grupo aki, di otro banda ta cuida nos isla y frontera cu definitivamente NO por carga e peso aki!
