E siman aki Minister di Husticia, mr. Andin Bikker, ta spera di institui un comision di “Vreemdelingketen” y esaki ta sirbi pa un proposito.
Na momento cu el a asumi e responsabilidad di Minister di Husticia, DIMAS no tabata resorta bou di dje, pero awo esaki a bin ful bou su responsabilidad. E vreemdelingketen ta rekeriendo hopi atencion y e Minister kier bin un miho coordinacion entre e departamentonan, pasobra den fin di siman cu a pasa a experencia esaki.
A detene un coach di deporte y e tabata cera pa 1 siman largo. Mayornan, muchanan y e organisacion di Gymnastiek Aruba CGA Avanse a bay dilanti Bestuurskantoor pidiendo pa laga e coach bay. E coach tabata na Aruba pa 11 luna sin un permiso di estadia y/of di trabou, pero Minister di Labor y Minister di Deporte tabata OK p’e keda. Asina aki Minister di Husticia Andin Bikker a dun’e un dispensacion p’e ta na Aruba y warda riba su permiso di estadia y trabou.
DIMAS ta percura pa tramita permiso, Warda Nos Costa ta percura pa control y pa personanan cu no tin nan status na ordo pa deporta nan. Bou di maneho di Minister Glenbert Croes tin e maneho di admision den e mercado di labor pa prome biaha. A ripara cu hopi biaha no tin coordinacion suficiente optimal entre e departamentonan. Esey ta pone esunnan cu ta aplica y ta tarda pa procesa nan permiso, ora di control severo via Warda Nos Costa, ta haya personanan aki y aya sin cu nan tin culpa cu nan status no ta na ordo.
Gobierno na final di augustus a perde un caso den Corte, cual instancia a bisa cu “e persona envolvi eynan no por yuda cu tabatin tardansa. El a aplica na tempo lunanan a pasa pero no a haya su permiso y e tin derecho. Pasobra conforme e maneho e ta bin na remarca p’e”. Esey tabata e caso di fin di siman, unda tabatin hopi conmocion a base di un coach di deporte. Na comienso di aña el a pidi pa nan aplica pa un permiso, pero e gobierno anterior tabatin un maneho cu nan a prolonga na maart 2017. Esaki tabata specialmente coachnan di deporte y deportistanan, e mandatario a bisa.
El a lesa for di e toelatings handboek di maart 2017 riba pagina 35 y 36, cual ta bisa cu si un institucion di deporte na Aruba pidi pa tin un coach, nan ta haya esaki. E persona no mester pasa e toets di labor, pero simplemente e persona ta haya un permiso pa 3 aña so y e no mag di bin cu su famia. Tambe tin clubnan di deporte manera clubnan di futbol por haya te 3 permiso pa deportistanan cu nan kier pa aparece den nan team. Esey ta pone cu ta un gobernacion tin, e gabinete por cambia pero gobernacion ta continuacion, e mandatario a termina bisando.
