Minister Bikker: Situacion na Guarda nos Costa a pone cu no por a warda pa tene un destaho publico

814

Minister di Husticia mr. Andin Bikker diasabra ultimo a reacciona riba Minister Marisol Lopez Tromp despues cu e Minister aki a duna cierto declaracion den Parlamento diabierna ultimo.

Minister Lopez Tromp a tilda Minister Bikker cu el a firma un contracto sin bay destaho publico como si fuera esey ta algo cu no ta permisibel. Minister Bikker a splica cu articulo 26 den ley di comptabilidad, ta duna e oportunidad pa por desvia di destaho publico ora tin casonan di urgencia. Articulo 3 inciso i, di e aanbestedingsverordening, cu a keda aproba dor di Parlamento aña pasa, ta bisa cu hasta ora ta trata di proyectonan pa salvaguardia siguridad nacional, e aanbestedingsverordening no ta aplicabel.

Reaccion di Minister Andin Bikker riba acusacionnan y insinuacion sin base di Minister Marisol Lopez-Tromp den Parlamento

Reaccion di Minister Andin Bikker riba acusacionnan y insinuacion sin base di Minister Marisol Lopez-Tromp den Parlamento

Posted by 24ora on Saturday, August 1, 2020

Den e caso specifico aki, ta trata di un proyecto di sumamente urgencia pa Guarda nos Costa debi cu Aruba ta confronta cu e situacion cu Venezuela unda miles di persona a bin Aruba pa pidi asilo. A bin cu e maneho pa persona bolbe nan pais boluntario y ta bayendo di 700 pa 1000 persona cu kier bay bek nan pais. Tambe tin e situacion cu for di basta luna e capacidad pa detencion di personanan na Guarda nos Costa ta limita. Momento cu a bin cu Toque de Queda, control di trafico y control regular, a topa cu varios persona ilegal. Un par di dia atras, riba un solo dia Cuerpo Policial a haya 19 ilegal den un cas y tur esakinan ta trece un reto pa e pais pasobra no tin caminda pa pone e personanan aki. Tin persona cu ta caba di sinta nan castigo na KIA y pendiente nan deportacion mester tin espacio pa por detene nan.

Bikker a bisa cu e situacion cu frontera di Venezuela y Colombia ta uno dificil actualmente. For di basta siman caba ta pendiente pa por logra haya vuelo pa Venezuela pero debi na diferente situacion diplomatico no a logra un acuerdo cu Venezuela. Momento cu ta kere cu ta bay tin un vuelo, nan ta keda posponi. Mirando tur e situacionnan aki, Minister Bikker a splica cu mester keda eherce e ley di LTU di admision y expulsion y pa esey mester di espacio pa detencion. Si bay un destaho publico e lo por dura un 6 pa 8 luna unda cu mester cana e proceso di traha bestek y TOR (Terms of Reference) anto obviamente den e circunstancia di  Coronavirus no por warda riba esaki y pa cu esey Minister Bikker a haya conseho di Guarda nos Costa mes.

Tambe Minister a splica cu e no ta traha contracto pero e departamento huridico di bureau ta traha esaki y tampoco e no ta sinta cu contratista y DOW pasobra esey no ta su tarea. Riba e situacion aki Minister Bikker a bay dos biaha Parlamento unda el a haya e sentimentonan di Staten pa loke ta trata e proyecto. Tambe e mandatario a bay cu un concepto di ley pa un begrotingsfonds y Parlamento dos biaha a duna Minister Bikker aprobacion pa despues traha un Ministeriele Beschikking den consulta cu Minister di Finansas, manera ta prescribi den articulo 26 di comptabiliteitsverordening y despues percura pa tin presupuesto.

Tur e procesonan ey a cana y despues DOW a informa cu nan no a haya suficientemente consulta riba e contracto. Despues cu Minister Bikker a tuma nota di esey, a duna tarea di biaha por escrito na Minister Marisol Lopez Tromp como tambe na Director di DOW, pa nan sinta na mesa cu e contratista pa mira con por adapta e contracto. E contracto aki tabata uno di urgencia pasobra Aruba tin e situacion cu mester di luga pa pone e ilegalnan. Dos siman pasa cinco persona a huy y despues e siguiente siman shete persona a huy. Tin di e ilegalnan a subi riba tereno di aeropuerto, tur esaki ta un situacion cu cada pasa tanto dia tin problema na Guarda nos Costa y esey a haci cu a duna e situacion atencion urgente cu e tabata rekeri.