Manera ta conoci, awe mainta un otro preso a huy for di KIA. Ta di dos preso cu ta huy den un tempo cortico for di e prizon na Santo di Patia, mientras cu for di Warda di Polis na Santa Cruz tambe un preso peligroso e huy algun siman pasa y te awe no por hay’e bek. Bisando esaki, awor tin dos preso peligroso riba caya. Minister Andin Bikker, politicamente responsabel pa maneho di Husticia na Aruba a reacciona un rato pasa confirmando cu berdad e helicopter ta para y no por bula na e momento crucial aki!
E mandatario a sigura si cu tur otro departamento hudicial a activa mesora pa busca paradero di e preso. E Minister, kende for di tempo di campaña a primiminti un helicopter y un di e argumentonan pa traha cu e grupo Colombiano aki tabata cu lo reemplasa e helicopter ora tin mester, awor a hay’e cu su prome “reality check”.
Parce cu e helicopter ta den mantencion prescrito y ta den proceso di registracion di Colombia pa Aruba. Consencuentemente e ta na tera y no ta trahando. Den esey e compania no a percura pa un otro helicopter bin reemplasa esun cu no por bula pa rasonnan administrativo.
Pero mas leu e mesun Minister Andin Bikker ta manda informa prensa via su Relacionista Publico, cu e e piloot di e Helicopter di Polis tampoco ta na Aruba. “E piloot a haya su mes cu un biahe di emergencia pero su baymento tabata planea”, asina e Minister a informa. Ta cuestiona con un hende por biaha di emergencia pero planea. Entodo caso, e compania Colombiano a lanta bay laga helicopter atras sin piloot mientras aki preso ta huy pa loco di prizon y tur autoridad man crusa pasobra e herment cu tanto a promove cu lo soluciona criminalidad ta na tera!
Minister Bikker a bisa cu pesey e ta boga tanto pa un prizon nobo, pero cu e retonan financiero cu e Gobierno aki a hereda ta haci esey masha dificil awo.
