Awe tardi mes Minister mr. Andin Bikker a reuni cu e trahadonan y cu Sub Inspector di Polis, Richard Kramers. Awe mainta caba el a reuni cu Trudy Hassell y Richard Kramers pa e traspaso oficial di e trabounan. Y pa no perde tempo, atardi caba a presenta e hefe nobo na e sindicatonan y na e empleadonan. E minister ta sinti cu e cambio a cay den masha bon tera y cu e trahadonan ta contento cu e biento fresco suplando den Guarda nos Costa.
Ta for di e reunion antayera caba cu e trahadonan cu a sinti cu nan kier cambio. E situacion eyden no ta agradabel mas pa traha den dje y e mando no a yuda den esey. Mientras cu di un banda e minister ta acepta cu e trahadonan tabata kier mira un cambio, di otro banda el a elogia Trudy Hassell masha pa su trabou y logronan for di aña 2018 cu e ta den e funcion. E tin bon palabra pa su funcionamento, pero asina mes a acepta su retiro ayeranochi y awe mainta ya a nombra otro caba, pa evita cu Hassell ta cambia di opinion.
Kico lo sosode awo cu Hassell no ta conoci ainda. Minister Bikker a bisa cu ta mucho prematuro pa papia di esey awo. A puntr’e si Hassell ta regresa Cuerpo Policial pero e no por a contesta y a bisa cu pa awo e ta cu vakantie y duna tempo, tempo.
Pa loke ta Richard Kramers, ya caba el a presenta un plan di e cambionan lihe cu por haci pa e funcionamento eyden por bira miho. El a papia cu e detenidonan y cu e trahadonan. E ta sinti cu por biba miho cu otro den e momentonan dificil aki, tanten cu frontera ta sigui cera cu Venezuela. Minister y e trahadonan a acepta e plannan presenta y como tal, ta cuestion di pone nan den ehecucion awo.
Minister Rudy Croes, apenas a asumi su funcion di Minister di Husticia na fin di 2001, a institui Guarda nos Costa na aña 2002 cu Trudy Hassell como e prome hefe. E tabata un seccion di Cuerpo Policial. Cu tempo a pas’e bao IASA y despues bou Migracion Aruba. Pero discusion constante entre Migracion y GNC a pone cu aña pasa a logra haci GNC un departamento autonomo cu a sigui bou ministerio di husticia directamente y no bou Migacion mas.
