Manera ta conoci, despues cu e matutino Awe Mainta a saca un primicia di cambionan den DIMAS den cual lo a baha mr. Kathy Paskel como Director, mesora Minister Andin Bikker a sali desmenti e noticia. Nos fuentenan sin embargo ta garantisa cu e decision pa bin cu un “management team” na DIMAS, na KPA y na IASA ta confirma y cu e departamento concerni ya a traha riba e cambio caba. Ta duna un impresion serio cu tin cambionan drastico tumando luga den Ministerio di Husticia sin cu e Minister mes ta consciente of ta na altura di dje.
Edificio di DIMAS situa den Paardenbaaistraat.
Pero awor cu na DIMAS parce ta reina trankilidad bek, despues cu Minister Bikker a para intencion di su consehero, a drenta informacion cu na IASA tambe a informa nan di e mesun decision aki, esta cu lo hala Gerald Vingal un banda pa bin cu un “Management Team”. E ta un forma legal pa persigui directornan, dor di hala nan un banda, sigui paga nan salario, pero sinta na cas of den otro funcion na otro departamento. Esaki a sorprende tur hende, pasobra Gerald Vingal ta gosa di masha elogio, tanto local e internacional, pe forma profesional y eficiente cu el a logra cambia e cultura y servicio na Migracion. Bou di e empleadonan mes ta sinti un biento fresco suplando, desde cu Vingal ta na timon di e barco, esta for di Januari 2014.
Drpd: mr. Joselin Croes, Consehero di Minister, Gerald Vingal, Director di IASA, Minister mr. Andin Bikker y mr. Kathy Paskel, Director di DIMAS, durante un conferencia di prensa algun siman pasa.
Entrante dia 1 di september 2017, oficialmente Instituto Alarma y Siguridad Aruba (IASA), funda tempo di Minister Rudy Croes, a stop di existi. Na su luga a funda Migracion Aruba, cu Gerald Vingal na cabes. E departamento aki ta atende tur asunto di migracion na aeropuerto y wafnan, mientras cu Warda nos Costa a pasa tambe bou di nan.
Na September ultimo a estrena uniform nobo pa empleadonan di Migracion. E uniform nobo tin un parecido na esun di Customs Border Patrol di Merca
A introduci e ofishi di ambtenaar di Inmigracion dia 19 di maart 1969 bou di Cuerpo Policial di Antias, den e departamento “Sectie Vreemdelingen Politie”. Dia 1 di september 2002 a los e departamento for di Cuerpo di Polis y a inclui den e organisacion nobo DINA (Directie Immigratie en Naturalisatie Aruba). Cuater aña despues na 2006 a elimina DINA y a crea IASA (Instituto Alarma y Siguridad Aruba) unda a aloca Radar 911, Warda nos Costa y Servicio di Inmigracion. Te awor Servicio di Inmigracion ta consisti di mas o menos 60 empleado mientras cu Warda nos Costa ta conta cu mas o menos 17 empleado.
Nos lo ta pendiente di Minister Andin Bikker si e lo hala e decision aki tambe aden, pa evita mas intrankilidad den e aparato hudicial, mirando cu den Cuerpo Policial tambe ta reinando un ambiente masha hostil debi na cambionan politico cu kier introduci den top di e organisacion policial cu normalmente mester por traha independiente di politica.
Hendenan yega na e Minister ta sigura nos cu un cantidad di decision, compromisonan y maneho adapta ta tumando luga sin cu e mandatario responsabel mes ta consciente. Esaki ta un tendencia masha preocupante y serio, ora cu Conseheronan di Minister cuminsa actua manera Minister, hincando e propio mandatario, cu ta un top abogado y bon conocedo di ley, den problema politico serio cu henter e mundo hudicial di nos pais.
