Durante su bishita di trabou na Aruba Minister Plenipotenciario Guillfred Besaril, hunto cu su colega Minister di Enseñansa, Ciencia y Desaroyo Sostenibel, dr. Rudy Lampe y Departamento di Enseñansa a organisa un encuentro pa hobennan cu tin intencion di bay studia na Hulanda pa aña escolar 2019-2020. Un grupo di mas of menos 400 studiante y mayor a presenta diahuebs ultimo 20 di juni den e auditorio di Colegio EPI pa asina ricibi informacion di entre otro Departamento di Enseñansa, Arubahuis, Censo, AZV y KLM. E diferente instancianan a duna informacion riba e aspectonan esencial cu e futuro studiantenan mester atende y tene cuenta cune durante e periodo di preparacion prome cu nan salida pa Hulanda y tambe na nan yegada na madre patria.
Minister Plenipotenciario durante su discurso a felicita e hobennan pa e desicion cu nan a tuma pa continua cu nan estudio den exterior. E mandatario ta sumamente contento di a mira un cantidad grandi di studiante acompaña pa nan mayornan na e encuento. Minister Besaril a comenta cu Arubahuis ta den e proceso pa haci e cambionan necesario den e organisacion pa por sirbi e studiantenan Arubano residencia na Hulanda mucho mas miho. A fortifica e forma den cual ta duna sosten y guia na e studiantenan door di entre otro amplia e team di mentoren y a facilita e proceso di contacto cu e departamento di studiantenan di Arubahuis.
Departamento di Enseñansa durante nan presentacion e anochi aki a recorda e studiantenan tocante e reglanan di Arubalening y e rekesitonan cu e studiantenan mester cumpli cune. Tambe a duna informacion extenso riba e topico di seguro cu desde e aña aki a bira responsabilidad di e propio studiante pero ta keda un rekisito importante pa por cualifica pa ricibi Arubalening y e ticket di viahe. Arubahuis di su banda a duna un presentacion extenso riba locual e studiantenan por spera na momento di yegada na Hulanda pa loke ta trata e guia y sosten for di Arubahuis y tambe a enfoca hopi riba e topico di vivienda cu ta keda un reto pa studiantenan na Hulanda. Durante e anochi aki ambos Departamento di Enseñansa como Arubahuis a enfatisa na e studiantenan y na e mayornan cu e ta sumamente importante pa tuma nota di e informacion y instruccionnan di e instancianan competente y pa sigui esakinan pa asina e proceso completo di aplicacion y emigracion por cana positivo y sin ningun retraso of incidente.
Tur informacion cu a wordo comparti durante e anochi di informacion ta wordo publica riba e website di Departamento di Enseñansa www.ea.aw. Tambe por like e pagina di Facebook di afdeling Onderwijszaken di Arubahuis @OnderwijszakenArubahuis y Departemento di Enseñansa @EducationAruba pa keda bon informa di cualkier desaroyo.
