Minister Besaril ta extende palabranan di condolencia na famia di sr. Frido Croes

962

Minister Plenipotenciario sr. Guillfred Besaril den nomber di staf y personal di Arubahuis ta manda su mas sincero palabra di condolencia na sra. Lourdes Croes-Figaroa, sr. Francis Croes y sra. Joce-anny Jacobus-Croes cu fayecimento di ex Minister Plenipotenciario di Aruba na Hulanda sr. Frido Croes awe 9 di oktober 2020.

Sr. Frido Croes despues di a caba su estudio di maestro na Arubaanse Pedagogische Academie a duna diez aña largo les na Colegio San Hose. Na 1988 sr. Frido Croes a drenta politica y entre 1989 y 1994 e tabata miembro di Staten di Aruba pa partido MEP, di cual e ultimo aña ela ocupa e funcion di vice presidente di Staten.

Na 2001 sr. Frido Croes a keda nombra como presidente di Staten. Despues di e nombracion di sr. Fredis Fefunjol como Gobernador di Aruba, a haci un apelacion riba sr. Frido Croes pa tuma e encargo di minister di Enseñansa den Gabinete Oduber III. Despues di eleccion na 2005 y cu instalacion di Gabinete Oduber IV, sr. Frido Croes a keda nombra como Minister Plenipotenciario di Aruba na Hulanda. ‘Aruba a perde un gran politico y maestro di scol. Un homber cu un bunita caracter y cu un amor grandi pa su pais. Pami personal sr. Frido Croes tabata un mentor na momento cu mi a tuma e decision di drenta arena politico. Su bon guia y avisonan valioso a conduci mi na unda awe mi ta como politico. Mi gratitud ta inmenso y eterno! Nos pensamento ta bai na su esposa, yuinan y famia den e dianan dificil aki. Cu Frido sosega na Paz’, segun palabranan di Minister Plenipotenciario sr. Guillfred Besaril.