Minister Besaril cu bishita oficial na Universidad Nyenrode

Recientemente Minister Plenipotenciario, sr. Guillfred Besaril, tabata di bishita na Universidad Nyenrode. E mandatario a wordo acompaña pa director a.i. di Arubahuis, sr. mr. Glenn Ling y coordinador di Enseñansa di Arubahuis, sr. drs. James van der Linde.

Minister  Besaril y su delegacion a keda ricibi pa Profesor dr. T.M. Berkhout y Profesor dr. señora Désirée van Gorp. Tambe presente tabata sra. Germaine Rekwest di Universidad Erasmus di Rotterdam.

Minister Besaril a cuminsa na bisa di ta contento cu e oportunidad pa a bishita y sinta na mesa cu Nyenrode. E mandatario a bisa cu meta di e bishita ta pa sondea posibilidad pa cooperacion cu e instancia educativo aki na bienestar di e desaroyo di e personal di Arubahuis. Ta trata di un grupo di functionarionan cu experencia, sinembargo e retonan di awendia ta exigi mas preparacion y conocemento di nan parti.

E mandatario a remearca cu no por papia sin mas di “Sustainable Development Goals” (SDG’s). Esakinan ta metanan cu Nacionnan Uni a stipula y Gobierno di Aruba kier implementa den maneho pa futuro. P’esey pa minister Besaril ta importante pa functionarionan di Cas di Aruba por profundisa nan mes den e materia aki.

Universidad Nyenrode a reaciona positivo riba e peticion di minister Besaril. E instituto lo bin cu un proposicion pa un trayecto den cual ta cubri temanan manera “Small Island Developing States (SIDS)”, SDG’s y “Economic diplomacy”. Tambe a papia riba Union Europeo como tema, principalmente e aspecto di yega na e fondonan nesesario pa realisa proyectonan na Aruba. Esaki ta un disciplina riba su mes.

Nyenrode ta dispuesto na analisa unda por incorpora e hecho cu Aruba tin un LGO status y con por saca e beneficionan necesario na bienstar di comunidad Arubano. Minister Besaril a enfoca cu banda di e echo cu e conocemento mester keda Arubahuis, lo mester mira tambe si den un futuro sercano por tin algun oportunidad interesante pa otro departamentonan di Gobierno na Aruba. Despues di e reunion minister Besaril y delegacion a haya un guia den e facilidadnan di Universidad Nyenrode, pero prome cu esey minister Besaril a haya e oportunidad na scirbi un mensahe den e buki oficial di e Universidad como recuerdo di e bishita.