Minister Plenipotenciario Guillfred Besaril riba invitacion di Genootschap Nederland Aruba (GNA) tabata orador special na e encuentro anual di e miembronan di GNA. E mandatario a elabora riba e vision di Gabinete Wever-Croes riba innovacion.
Minister Besaril a cuminsa na para keto na e hecho cu Gabinete Wever-Croes ta un aña na mando. Un aña cu hopi reto y unda e ser humano ta central, asina sr. Besaril a bisa. Alabes e mandatario tambe a duna un resumen di su prome aña como Minister Plenipotenciario.
Minister Besaril: “Den mi prome aña mi a concentra riba duna informacion y preparacion di studiantenan Arubano cu ta bin Hulanda pa studia. Un mihor preparacion ta pone cu nan por cuminsa nan estudio cu menos dolor di cabes. Pa e motibo aki mi a bai Aruba pa duna presentacionnan na tres scolnan secundario.”
Minister Besaril a sigi bisa cu guia di nos studiantenan tambe ta hopi importante. “Pesey nos a aumenta e cantidad di mentornan di cuater pa ocho. Tambe mi a introduci un asina yama “studentenvolgsysteem”. Cu e sistema aki nos tin bista ki tipo di estudio nos hobennan ta sigi y asina nos por suministra doñonan di trabao na Aruba cu e informacion aki.”
E mandatario a mustra riba e importancia di fortalisa e organisacion cu ta Arubahuis. DRH a haci un estudio pa reorganisa Arubahuis pa ta menos administrativo, pero mas envolvi y pa duna mas servicio na e comunidad Arubano na Hulanda. Otro aspecto pa loke ta e organisacion ta cu e desicion a cai pa renoba Arubahuis. “Nos Gobierrno ta kere den haci e sector primario un pilar importante di nos economia. Pa e motibo aki den mi prome aña mi a bishita y papia cu diferente institutonan y companianan pa sondea posibilidadnan pa inverti den e sector primario na Aruba cu tecnologia innovativo. Nos tur sa e reto cu nos cunukeronan tin pa cu awa na un prijs abao. Den esaki mi a bin ta duna mi colega minister encarga cu sector primario e sosten nesesario cu tur e conocimento y experticio cu tin na Hulanda y mira cual sistema ta util na Aruba,” asina minister Besaril a bisa.
Otro aspecto di innovacion cu minister Besaril a elabora riba dje ta e proyecto District 297 cu ta un plataforma pa Arubanonan den exterior por duna un contribucion na e desaroyo di Aruba. Tambe Districto 297 ta boga pa mas union entre Arubanonan den exterior. E tarea di e plataforma aki ta pa medio di asina yama “think tank sessions” trece Arubano cerca pa intercambia cu otro y crea un modelo economico innovativo, creativo y vital. Un proyecto concreto cu a sali for di e sesionnan aki ta e Kids4Bytes, cu ta yuda muchanan desaroyo abilidadnan di e siglo 21 pa medio di programacionnan.
E programa a conta tambe cu un presentacion corto di director di Stichting Monumentenfonds Aruba ing. Anne Witsenburg. Den su introduccion sra. Witsenburg a ilustra kico su fundacion ta encera y su significacion pa monumentonan na Aruba. Acualmente Stichting Monumentenfonds tin 12 monumento bou di nan supervision. E edificionan ta wordo renoba pa Stichting Monumentenfonds y ta wordo poni na huur.
Entre e discursonan tambe tabata tin un intermezzo musical di Kris Berry acompaña pa gitarista Jean-Jacques Rojer. Escritor y poeta Arubano Henry Habibe a declama for di propio poesia.
Presidente di Genootschap Nederland Aruba Nico van Grieken a papia riba e existencia di GNA y cu aña pasa a celebra 20 aña di existencia, cu oradornan di nomber manera Princesa Laurentien y Thom de Graaf, cu recientemente a keda nombra como vice presidente di Raad van State. Tambe sr. Van Grieken a bisa cu GNA ta hopi contento cu e discurso cu Prome Minister Evelyn Wever-Croes a duna den Perscentrum Nieuwspoort na juni ultimo. Sr. Van Grieken a cita Prome Minister Wever-Croes cu a bisa di ta kere den Reino Hulandes y cooperacion den Reino. Tambe cu e prome mandatario a enfatisa cu Aruba ta maneha su retonan su mes y cu energia. Segun Wever-Croes un di e retonan grandi di Aruba ta e situacion financiero di Gobierno, pero cu Aruba no ta pidi Hulanda placa, sino tempo y espacio pa realisacion di un maneho financiero nesesario, pero responsabel. “Cu e actividadnan aki GNA ta purba na trece mas comprension na Hulanda di e relacion entre Aruba y Hulanda y Aruba su posision den Reino Hulandes,” asina presidente di GNA Nico van Grieken a bisa.
