Conseho di Minister di Reino (RMR) den nan reunion awe diabierna 3 di april a papia riba diferente temanan cu ta regarda e crisis di e Coronavirus. Asina Minister Plenipotenciario Guillfred Besaril a bisa despues di a sali for di e reunion. Un di e temanan cu a trata ta salubridad publico. Segun e mandatario e situacion ta diferente pa cada isla y cu por ehempel na St. Maarten e necesidad ta hopi mas grandi cu e otro islanan, pasobra St. Maarten ainda ta recuperando di e golpi basta grandi cu e isla a haya di dos orcan tres aña pasa.
Tambe den e reunion di RMR a papia riba ayudo militar y con esaki lo por bira efectivo na momento cu esaki bira necesario. ‘Papiando di actividad militar na nomber di pais Aruba mi a trece padilanti na Minister di Defensa, Ank Bijleveld, e paso tuma pa Merca pa pone movecion militar den Caribe y kico esaki ta trece cune pa cu Caribe.
Minister Bijleveld a keda di comunica cu e Embahador di Merca na Hulanda pa asina nos tin un miho bista kico e accion militar aki di parti di Merca ta nifica pa e resto di e region Caribense,’ asina Minister Besaril a bisa.
E mandatario a sigui bisa cu pa loke ta e region Caribense, cu Nacionnan Uni dos dia pasa a trece dilanti nan preocupacion pa loke ta e limitacionnan natural di e region cu tin frontera cu awa y cu nan ta mira tambe riba e poco recursonan di e islanan.
Na final Minister Besaril a bisa cu a toca e tema cu ta esun importante pa loke ta pais Aruba. Minister Besaril: ‘No menos y mas importante cu e otro problemanan cu a keda trata, pero tambe un preocupacion enorme pa nos isla cual ta e aspecto financiero. Riba esaki nos a palabra cu otro cu nos lo sigui e dianan aki den combersacion estrecho entre e diferente Ministerionan di Finanzas pa asina aki otro siman nos cuminsa yega na decisionnan concreto kico ta bay ta e ayudo; con e ayudo aki ta bay tuma luga y ki tur e ayudo financiero ta bay encera, segun declaracion di Minister Besaril.
E mandatario a finalisa na bisa cu e Coronavirus aki ta toca tur sector den nos comunidad y cu e ta un guera contra un virus cu a pone mundo henter na rudia y awe mundo lo mester mira con ta lanta cabes y para riba nos pia bek.
