Minister Besaril a introduci compania Europeo cu ta interesa pa construi un Sustainable Convention Center na balor di 150 miyon

Minister Plenipotenciario Guillfred Besaril ta na Aruba pa asuntonan di trabao y tabata tin un encuentro entre CEO di APA Marc Figaroa, Humphrey Tromp CFO di APA, Lex de Ridder CCO y Dave de Bate cu ta representa e compania Swiss Tech Convention Center. 

Durante e prome encuentro cu Minister Besaril tabata tin cu Dave de Bate ela haya un presentacion di e “Sustainable Convention Center”. E mandatario a mira cu e projecto aki ta ideal pa Port City y pesey a keda mantene contacto estrecho cu Dave de Bate pa di e forma aki Arubahuis por a keda coordina tur e preparacionnan pa e presentacion por a tuma a tuma lugar na APA. Presente na e encuentro aki tambe tabata director a.i. di Arubahuis mr. Glenn Ling y funcionarionan di Arubahuis Roy Hart engarga cu departamento di Economische Acquisitie y James van der Linde di departamento di Enseñansa.

Si e convencional center aki  bai Aruba esaki lo por bira esun di  mas grandi den Caribe. Aki ta trata di un convencional center cu ta multifuncional y cu tin espacio pa acomoda riba 4000 persona. Ya caba companianan manera RAI na Amsterdam y compania na Merca y Canada a mustra interes na momento cu e proyecto keda finalisa. Aki ta trata di un inversion di 150 miyon euro y lo duna economia di Aruba un contribucion enorme, mirando cu durante e construccion 200 hende lo haya trabao. Y ora e convencional center ta operacional e ta brinda trabao na 125 hende.

Durante e reunion Minister Besaril a splica cu Arubahuis semper a duna un gran aporte na APA.

Entre otro cu e cooperacion cu Port of Amsterdam, Iskes y awor un proyecto di e magnitud aki, manera Sustainable Convention Center. E ehecutivonan di APA a expresa nan positivismo pa cu e proyecto aki y su balor grandi pa Port City.

E dia siquiente tabata tin un presentacion di e Proyecto di Dave de Bate na Minister di Turismo Dangui Oduber, den presencia di Minister Besaril. Despues di e presentacion Minister Oduber a keda impresiona y a expresa cu e proyecto aki lo nifica un gran aporte pa Aruba.

Minister Besaril a keda satisfecho cu tur e reunionan cu a tuma lugar y pa cu e proyecto aki por bira realidad pa Aruba.