E prome grupo di artistanan cu ta presenta na Arubadag Festival 2019 diadomingo awor den Ahoy, Rotterdam a yega Hulanda. Esakinan ta e agrupacion Honeypot y D’-Licious, Rey di Tuma Rocco Franken, ganador di Caiso Lady Ambiance, ganador di Soca Monarch T money, reina di Dande Charella Lopes y Dj Sky.
E delegacion tambe a consisti di algun miembronan di prensa cu a bin Hulanda pa haci cobertura di e evento aki. Tabata tin representantenan di Top FM y Power FM.
E delegacion a wordo cordialmente saluda na Aeropuerto Schiphol pa Minister Plenipotenciario Guillfred Besaril y coordinador di Arubadag Festival 2019 Sidney Kock. Minister Besaril a bisa e artistanan cu Arubadag Festival ta e evento aki na Hulanda pa mustra e importancia di cultura di Aruba. Musica y e cushina crioyo ta aspectonan importante di cultura di Aruba. ‘Boso ta exponente di e cultura di nos dushi isla Aruba. Diadomingo awor e publico grandi cu lo ta den Ahoy lo por disfruta di boso presentacion. Mi ta conta cu boso lo pone un tremendo show riba e escenario den Ahoy na e Arubadag Festival 2019,’ asina e mandatario a bisa e artistanan prome cu nan a sali pa nan hotel.
