Ciclistanan ta boga pa mas espacio riba caminda. Segun e mandatario a splica cu nan tabata tin un reunion cu e ciclistanan, diferente organisacion, Wielrenner bond tabata tey presente y a papia riba e incidente cu a sosode, caminda cu un hoben di 17 aña, kende lamentablemente tabata den un accidente cu por a wordo evita.
Ta pidi forsa na famia y pidi Dios sali bon cu e hoben aki, pa pronto e tey bek na Aruba y practica e deporte cu e ta stima. Esey tabata e palabranan di Minister Benny Sevinger ora a toca e tema di Fietspad.
Den e reunion eynan a palabra diferente punto cu ta kere cu ta di importancia. Uno ta infrastructura pa ciclistanan. Si mira den e ultimo ocho añanan, cuanto hende ta core bicicleta, compara cu ocho aña pasa. Esaki a cuminsa bao di minister Visser, caminda cu a crea oportunidad pa movecion. Hopi hende ta practicando ciclismo, uno pa salud y e otro pa deporte. Otronan pa recrea. Esaki ta pone cu tin hopi mas bicicleta riba nos careteranan. E ora eynan tin cu bay over pa concientisa nos automobilistanan cu ciclista tambe ta parti di nos trafico. Kiermen tin cu tene cuenta cu esey. Baha velocidad, wak ora bo ta yega na un grupo di ciclista, wak con bo por laga nan bay y despues ora no tin auto di trafico contrario, e ora ta pasa nan y no purba di pasa cu trafico contrario, e ora bo ta cera e ciclista for di caminda.
Eseynan ta cosnan cu tin cu bay concientisa. Esey a palabra cu ta bin cu un programa di concientisacion a termino corto y a termino largo. Tambe a palabra cu e fiestpadden cu ta trahando riba Green Corridor. Watty Vos Boulevard lo tin fietspad. Linear Park tin fietspad.
Cu esaki ta bira e backbone di fietspad pa loke ta trata Aruba. For di e backbone aki ta bay conecta e fietspadnan aki entre otro cu scolnan. Kier pa e muchanan bay scol sano y sigur. Tin cu bay traha fietspad pa e muchanan yega di nan bario pa e scol y asina stimula esaki.
Nan a trece tambe un idea di traha un ruta cera na Sero Colorado. Den e proximo siman hunto cu Infrateam bishita Sero Colorado. Eynan tin mas espacio pa por haci algo pa e ciclistanan. E ora eynan hunto lo wak esaki. Tambe di parti di husticia, a pidi pa cambia ley, of adapta ley pa sanciona personanan cu no ta respeta ciclistanan riba caminda na momento cu un accidente pasa, pa concientisa esakinan.
Borchinan tin cu wordo poni y lo pone nan tambe. Ta compromete tambe, cu ora tin eventonan cu lo tuma luga, por ehempel un Challenge cu lo bay tuma luga na October, durante e simannan prome, lo por pone borchi di DOW, unda e hendenan aki ta entrena, pa avisa trafico pa baha velocidad, tin hende ta entrena. Esey tambe por yuda cu esaki.
E tabata un bon reunion. Ta spera cu e programanan di concientisacion cu ta bay traha hunto cu e ciclistanan por concientisa nos pueblo. Ta coriendo auto mas duro cu normal, segun e mandatario.
Tur bario, sin duda ta pidi pa plateau. Esey ta nifica cu tur bario ta sufri cu coremento di auto duro. Tin un problema di nos mes cu nos tin cu cambia nos comportacion, nos proceder den trafico, baha velocidad. Si bo yega un minuut laat, ta miho asina cu no yega. Of otro hende sufri daño di esey. Ban baha nos velocidad den trafico pa asina eynan tur hende ta safe y tur hende por disfruta, haciendo uzo di nos careteranan. Ta un mensahe cu e minister a duna. Hunto cu e ciclistanan lo bay bin cu un programa intenso pa concientisa nos comunidad.
