MINISTER ARMIN KONKET A HURAMENTÁ 318 ÁMTENAR

Gobièrnu di Kòrsou ta tuma akshon pa di su parti hasi Kòrsou limpi di korupshon. Un promé paso den e kuadro aki ta esun di fomentá un kultura anti korupshon bou di esnan ku ta traha den Gobièrnu. Djabièrnè último tabata un di e dianan riba kua e ministerio di Gobernashon, Planifikashon i Servisio (GPS) a para ketu na e importansia di e kompromiso pa prevení  korupshon.

Durante un seremonia ofisial 318 ámtenar a komprometé nan mes pa kumpli ku
nan obligashon legal pa ehersé nan funshon di un manera íntegro. E funshonarionan públiko aki a hasi nan huramentashon òf promesa dilanti Minister Armin Konket kende señora Gobernador a empoderá pa tuma e huramentashonnan. Tantu e minister komo e 318 funshonarionan públiko ku a hurmanetá òf hasi promesa por mira bèk satisfecho i orguyoso. E seremonia tabata unu digno, memorabel i inovativo. “Kòrsou Honesto” un deseo, un lema, un obligashon! Un di e lemanan di Ministerio di GPS ta: “Kòrsou Honesto”. E lema aki ta vosiferá e kultura di anti korupshon ku Minister Armin Konket ta deseá i ta para pe. Korupshon ta forma menasa pa stabilidat i seguridat den komunidatnan. Un komunidat den kua no tin stabilidat i seguridat lo mira kon su institutonan demokrátiko i balornan demokrátiko i étiko gradualmente ta keda miná, loke na su turno ta difikultá i te hasta imposibilitá protekshon di derechonan i libertatnan humano, polítiko i ekonómiko di siudadanonan di e respektivo paisnan. Gobièrnu di Kòrsou i minister Armin Konket no ta pará nan so den nan lucha pa hasi tur ku ta na nos alkanse pa eradiká korupshon. Nashonnan Uní, ya na 2003, a firma un tratado den kua ta komprometé nan mes na hasi tur loke ta na alkanse pa eradiká korupshon.

Kòrsou tambe tin e obligashon pa kumpli ku e tratado aki.
Huramentashon ta parti di esfuerso pa kombatí korupshon E echo ku tur funshonario públiko individualmente mester sea huramentá òf hasi promesa ta enfatisá e obligashon ku nan tin pa ehersé nan funshon di un manera íntegro. E funshonario públiko ku huramentá òf hasi promesa ta komprometé su mes na (sigui) biba i aktua manera ta spera di un bon empleado públiko konforme definishon den lei (LMA). E mester entre otro sea hustu, ta leal na lei i ta
insobornabel. E mester sa kiko por i no por. Pa sa kon un bon ámtenar mester komportá su mes, empleadonan públiko a haña un kódigo di kondukta. Durante e seremonia di huramentashon òf promesa tabatin, promé i despues di e akto di huramentá òf hasi promesa, splikashon di kiko ta bai pasa i kiko ta ferwagt di komportashon un funshonario públiko ku a huramentá òfhasi promesa. Esaki a tuma lugá di un forma inovativo ku  presentashonnan di video kòrtiku. Mayoria empleado públiko nunka a huramentá Realidat ta ku mayoria empleado públiko ku na e momentunan aki ta elaborando na Kòrsou nunka a hasi huramentashon òf promesa. Sigur no despues di 10 di òktober ku Kòrsou a haña un status di pais outónomo den Reino. Pronto e situashon aki lo kambia paso tur hende ke un “Kòrsou Honesto”. E funshonarionan di ministerio di GPS a dal e promé paso. E ekspreshon ku nan a haña komo punto di referensia ta “Si bo ke kambia mundu, anto kuminsá na bo mes”. Ku esaki den mente nan a komprometé nan mes pa traha huntu i asina krea un mihó Kòrsou ku honestidat i bon servisio. Pronto lo tuma tuma huramentashon òf promesa di ámtenarnan di demas ministerionan tambe, paso un Kòrsou honesto ta un Kòrsou bon sirbí.