Minister Andin Bikker y Wardacosta cu mas medida di siguridad pa piscadonan

Den un reunion plenario cu Directie Scheepvaart, Wardacosta (Kustwacht) , Cuerpo Policial, Santa Rosa, DTZ y conseheronan di Ministernan Romero y Bikker, a discuti e topico di nos piscadonan y nan practica di siguridad den boto ora di subi lama pa pisca. Como prome decision a tuma cu lo articula un grupo piloto, presidi pa Wardacosta, cu ta bay inventarisa y trece sugerencia pa Gobierno di con lo mester organisa e piscadonan y esunnan cu ta bay tira pisca. Esaki cu e intencion di duna espacio na e piscadonan pa nan ta prepara y cumpli cu tur rekisito di prevencion riba lama.

Den poco tempo ta spera cu e grupo aki lo trece solucionnan veridico pa Gobierno por pone fondonan disponibel pa adkiri e material necesario, pa otorga piscadonan e infrastructura di radio cu nan ta rekeri, pero den forma di “bruikleen”. Hunto cu esaki lo bin cu un campaña di conscientisacion pa tur cu tin boto y cu ta bay lama pa pisca.

For di momento cu Gobierno di Aruba a inicia e proyecto di Arupesca, tabata e intencion pa pone un “basestation” na Centro di Pesca Hadicurari, unda cu tur piscado cu boto mester tin un radio den nan poder, safetyvest, flair y demas cumplimento di siguridad necesario abordo ora di subi lama pa pisca. Pero realisticamente no tur piscado ta cumpli cu e rekisitonan y esaki ta trece como consecuencia cu lamentablemente na diferente ocacion piscadonan no ta bolbe tera.

Den e reunion aki tanto Minister Chris Romero y Minister Andin Bikker a tuma e desicion pa organisa y structura e situacion reinante cu piscadonan pa preveni, mas tanto posibel, cu mas di nos hendenan ta perde riba lama. Un reunion hopi fructifero unda tur presente a trece nan puntonan di atencion dilanti pa hunto traha riba solucionnan pa e situacion reinante.