Minister Andin Bikker y su conseheronan ta favoreciendo formalmente un compania di seguridad priva den gobierno. Departamentonan cu ta resorta bou di Minister Andin Bikker of otro Ministernan, ta esnan cu awe ta kita personal di CEA pa pone esnan di compania priva. Algun luna pasa Minister Bikker tabata tin e curashi di pone security no prepara pa asina subi cierto postnan clave den KIA.

Hendenan sin screening a bay tuma postnan over. E presion a bin mesun dia cual motibo e minister y su consehero amigo di e doño di compania priva e cambia idea mesora. Esey no ta tur. Awor un biaha mas ta saca un carta pa purba hustifica e uso di e compania priva di seguridad atrobe. Aki a kita hendenan di e post di CEA na Bombero pa cuida Helicopter. Gobierno mester paga huur di Helicopter y pone hende tambe pa cuida e helicopter cu ta henter dia riba tera. Tambe na Casa Cune a kita e persona di CEA y pone security priva di e mesun compania. Na Departamento di impuesto DIMP cu ta un lugar crucial di gobierno, tambe a pone trahadornan di compania priva.

Mescos a haci na DPL. Gobierno a saca DPL for di e edificio di APFA y mande den edificio di un sponsor di minister di labor. A elimina yen di ekipo di ijs na Andin Ice na Eagle y busca yen di Venezolano pa bin drecha e edificio pa por a acomoda DPL. Saca DPL for di un joya di edificio y mester a prepara un lugar no apto pa asina pusha DPL aden pa e sponsor priva gana placa. Lunanan largo di drechamento cu instalacion di airco tabata tin pa DPL por a drenta finalmente den e lugar. Awor pa colmo mester kita e post for di CEA pa duna un compania priva. Esaki ta mas bien malgastamento di placa di pueblo.

Comments

comments