Siman pasa Gobierno a anuncia den liiñanan grandi e maneho pa loke ta admision. Segun Minister di Husticia, Andin Bikker, lo bay delinea e maneho pa por publik’e dia 1 di November, ora e ta drenta na vigor. E maneho por escrito lo ta determinante.
Pa loke ta trata e personanan cu lo por bin aki, ora cu e casa tin un permiso, un status legal cu no mester warda nan permiso como un yiu of un casa, e grupo eynan hustamente a bin cu rekisitonan mas stringente. Por ehempel, e tres aña a keda valido. Bikker a sigura cu un stranhero cu haya un permiso no ta nifica cu automaticamente e por bin biba aki cu henter su famia. E exigencia ta keda cu Bo mester tin tres aña minimo bibando na Aruba cu un permiso legal, pa por haci peticion riba reunion familiar. Tambe a pidi cu mester tin un entrada minimo. E entrada eynan ta den deliberacion pa cuanto e lo ta.
Tambe, pa inversionistanan ta contemplando awor aki un maneho mas streng. A ripara cu e maneho di e gobierno anterior, cu si bo lanta un compania, si bo tin 40% so den e compania, Bo demostra riba papel cu Bo tin por lo menos 10 mil florin, bo ta bin na remarca pa un permiso di inversionista. E enfoke di e maneho di Gobierno ta hustamente pa crea economia nobo. Economia di innovacion, economia di startups, economia di kennismigranten, etc. Pa por yega eynan a bin cu un maneho pa inversionistanan cu ta haci inversionnan substancial y no cu tur hende ta core bay lanta un compania, bisa cu nan ta un inversionista.
Segun Minister Bikker, ora cu bo ta inversionista, bo tin cu haci inversionnan substancial, cu na nos pais, nos propio yiunan di tera no por haci e tipo di inversionnan ey. E vision ta pa inversionistanan cu lo enfoca riba kennismigranten (personanan cu por trece dimensionnan nobo/economia via internet, innovacion, etc.)
Bikker tabata den parlamento 8 aña cu cada biaha e hiba su discursonan e ta señala un problema, pero ta bin cu posibel solucion. Na final di dia ta pais Aruba nos ta sirbi.
Minister Bikker ta invita parlamento y comunidad, si nan tin remarcanan constructivo pa mehora e maneho, gobierno ta completamente abierto pa esaki.
