Minister Andin Bikker para na crusada politico desastroso pa su carera

Tanto Ministerio Publico como awor tambe Minister Andin Bikker ta opta pa mantene silencio riba oro perdi of horta den Polis. Un caso cu a cuminsa malo, desaroya completamente robes, cera hende inocente pa lunanan largo y riba dje a horta parti di e cargacion di oro cu Polisnan di Recherche Samenwerkings Team a tuma den beslag y warda na Banco Central. Awor pueblo pagado di belasting ta sinta cu un recibo miyonario pa paga, no solamente pa oro cu “falta” pero tambe pa daño y perhuicio!

Ora acerca Ministerio Publico pidiendo pa informacion ta tende cu no ta papia riba e caso. Ora cu puntra Minister Andin Bikker e ta manda Bo pa Ministerio Publico. Un ta tapa pa otro.

Andin Ceasar Giovanni Bikker naci dia 20 di augustus 1969 ta Minister di Husticia y Migracion desde November 2017 den Gabinete Wever-Croes. Andin Bikker a participa na eleccion Parlamentario pa prome biaha cu Partido PDR na aña 2005 y a logra no menos di 1262 voto individual. Den eleccion na aña 2009 el a sigui crece y a alcansa 1621 voto riba su nomber. Den eleccion na 2013 el a casi redobla su votonan y a yega te cu 3047 voto personal. Den eleccion 2017, votadonan a castig’e pa su decision pa uni den POR y a cay den voto te cu 1086 voto individual, cu ta representa un caida di 64.3%.

Di acuerdo cu normanan di fatsoen y bon gobernacion, Minister Andin Bikker mester a saca su conclusion masha rato. Mientras cu ta horta bara di oro, Polisnan ta sin bala pa nan arma, presonan ta huy den dia cla for KIA y despues tambe for di warda di Polis. No cualkier preso. Presonan cu a cay pa droga y awor tambe pa asesinato riba caya y intento di asesinato den KIA mes. Te awe no por haya e preso tampoco, pa colmo!

Algun siman pasa Minister Bikker a bisa cu e siguiente conferencia e lo duna informacion riba e baranan di oro. Simannan a pasa y kizas hasta un luna a pasa y keto bay nada di informacion. Diahuebs atardi finalmente a logra convence Andin Bikker pa duna un declaracion. E declaracion aki tabata net net nada. Mas bien e mandatario cu ta core pa su responsabilidad ta core tira prensa den scochi di Ministerio Publico. E realidad ta cu e ta politicamente responsabel. Cu otro palabra e mester paga e prijs pa e baranan cu a ser horta.

Minister Andin Bikker para na crusada desastroso pa su carera politico. E lo entrega retiro si resulta cu Polisnan mes a…

Posted by 24ora on Friday, July 19, 2019

Na Corsow preso huy mesora Minister Pedro Atacho ta tuma retiro. Algo cu e minister actual Andin Bikker den opocision a pidi Arthur Dowers pa haci ora cu e tabata Minister. Awe cosnan pisa ta sosode y ningun musca ta bula. Al contrario, Andin Bikker ta sconde y no ta contesta preguntanan riba algo asina serio unda lo costa pais Aruba kizas sumanan miyonario na baranan horta y tambe daño y perhuicio pa perhudica hendennan inocente.

Cu e palabranan di Minister Andin Bikker durante entrevista, ta otro prueba cu e ta incapas pa goberna como mandatario di husticia. Loke a pasa aki ta algo hopi grave.

Polisnan di Aruba ta lamenta e susedido pero di otro banda ta cuestiona dicon ainda no tin un investigacion andando. Mescos pa e 1.3 miyon cu un coordinador di Prome Minister a ordena pa paga e compania cu ta bende municion cu Polis, sin cu el a cumpli completo te dia di awe! Nada di suspendion of detencion. Awo RST ta perde baranan di oro y ainda nada. Mayoria ta bisa cu si tabata un Polis local, masha ora lo a cer’e caba.

Minister Andin Bikker debe pueblo un contesta husto prome cu e prijs final drenta unda placa di pueblo mester bay cubri pa e blunder grandi den e investigacion y tambe pa e baranan horta.