Minister Andin Bikker: Malcontento den Brandweer no tin di haber cu su Ministerio

706

Minister Andin Bikker ta informa cu a base di esfuersonan di ministerio di Husticia tin varios avanse positivo na departamento di Brandweer. E preocupacionan di Sindicato SINBA ta regarda mas bien nan malcontento cu e maneho diario di e directiva di Brandweer

Minister di Husticia a tuma nota di e conferencia di prensa reciente di Sindicato SINBA y ta informa pa buena marcha cu a base di esfuersonan di ministerio di Husticia tin varios avansenan positivo na departamento di Brandweer. Loke ta pasa ta cu e Sindicato varios biaha a expresa di tin diferencia di opinion fundamental cu e maneho diario di e Departamento (‘bedrijfsvoering’), cual ta resorta den man di e Hefe di e Departamento, y cu claro ta nan derecho pa expresa a base di libertad di exprecion y e trabow sindical. En todo caso di banda Ministerio di Husiticia ta percurando pa e personal haya material di trabow, no obstante e situacionan hereda, e retonan di e pandemia y e situacion financiero di Pais Aruba.

Por menciona por ehempel cu a percura pa varios material di trabow manera dos E-One Crash Truck cu ta den proceso pa wordo manda Aruba, a bestel bluspakken nobo, sapatonan nobo, polo di uniform, stoelnan nobo, a percura pa e water coolernan wordo atendi, a bestel uniform pa sport training, a bestel pieza pa drecha dos di e Rosenbauer Trucks y e Crash Trucknan existente, a percura pa bay certifica na Jacksonville Florida, lo bay zorg pa por renoba (‘refurbish”) dos truck completamente, ta bezig hunto cu DOW pa por bay haci mantencion di edificio na tur e postnan y ta planificando pa un post nobo na Sta. Cruz, a zorg pa laga reemplasa e monitornan den kantine cu a danja pa un tipo industrial cu ta mas duradero, ta atendiendo hunto cu Departemento di Recurso Humano cu e tema di ‘maaltijdbonnenregeling’, a apunto un ex-miembro di Brandweer cu hopi experiencia, sr. Jaime Lacle, kende ta bezig cu doorlichtingsrapport, Departemento di Recurso Humano ta trahando riba un advies con lo por adresa e circumstancia no-premira cu a presenta pa un grupo ora a introduci e rangenstelsel nobo na 2013, y ta haciendo un maximo esfuerso den e cuadronan financiero limita pa por aloca fondonan necesario pa por atende cu otro temanan di werkmateriaal necesario, entre otro ademluchtapparatuur nobo. Pa loke ta trata e tema di falta di personal, Dienst Brandweer a haya 12 aspirant nobo.

Minister Andin Bikker ta compronde cu SINBA ta desea pa temanan por encamina mas lihe, pero tin hopi tema cu ta situacionan hereda cu ta data minimo for di 2013, y e circumstancianan di COVID y e situacion financiero di Pais Aruba a trece cierto retonan y tardansanan imprevisto, pero en todo caso tin varios avansenan positivo na departamento di Brandweer a base di esfuersonan continuo di ministerio di Husticia.