En conexion cu e reapertura di frontera cu Merca, Gobierno di Aruba a bin cu algun punto. Desde diabierna lo yega un averahe di 700 persona, diasabra un averahe di 1400 persona. Asina aki lo reactiva e economia bek. E Taskforce lo tene control riba distancia social, aglomeracion, siguridad di e localidad y permiso.
Ta bibando den e normal nobo y pa esaki lo sigui aplica algun regla. Tin e calamiteitenverordening cu cada 72 ora ta prolonga cierto medidanan pa por salvaguardia e pueblo y bishitantenan cu e reapertura di e mercado. P’e fase aki lo ta un apertura nobo pa Merca tin di bin cu cierto medidanan pa salvaguardia e siguridad di pueblo y bishitantenan. Minister di Husticia, Seguridad y Integracion, Andin Bikker a bisa, cu tur esaki no ta pa haci fastioso.
Tin personanan no a realisa cu ta bibando continuamente cu e Coronavirus y ta afectando e bida diario mundialmente. Desde cu a cuminsa suavisa e medidanan aki na Aruba, tin personanan cu a bay bek na e normalidad prome cu e virus, cual ainda ta existi. Awo cu ta reactivando e economia pocopoco y ta hayando bishitantenan di exterior, Gobierno mester tuma y recorda cierto pasonan pa salvaguardia e siguridad, bienestar general. E grupo aki ta bay over bek manera e tabata y no ta tuma e distancia social na serio. Actividadnan ta tumando luga y tin aglomeracion.
Segun Bikker, nan ta compronde cu hendenan kier bay bek manera pasado, pero e virus ta presente constantemente aunke cu a controla esaki pa lunanan. A haci esey cu medidanan severo y awo pocopoco ta bayendo na un normalidad nobo. A bin cu cierto medidanan pa actividadnan cu ta biniendo. Un di e medidanan ta cu e responsabilidad lo cay riba e doñonan di establecimento/negoshi, kendenan mester percura pa tin un luga di sinta designa pa salvaguardia e 1.5meter di distancia social. Esaki ta aplicabel tambe si un persona ta para un caminda. Esaki lo drenta vigor pa 12’or di diahuebs anochi. Un otro medida ta cu den areanan publico pa Cuerpo Policial mantene e ordo publico y reglanan di Departamento di Salubridad Publica, ora cu luga cera pa 11:00PM hopi persona ta bay aglomera na otro area publico. Si ta riba caminda publico, parknan publico, beach, tin di mantene e distancia social di 1.5 meter. Si no cumpli cu e medidanan aki, segun Bikker boet lo por cay.
A haci un analisis p’e fin di siman aki y lo bay tin 18 actividad desde oranan di merdia te anochi laat, asina Altocomisario Interino, Vanessa Tjon, a bisa. P’esaki a adapta maneho pa algomeracion y permisonan di diferente localidad. E Taskforce cu ta consisti pa Cuerpo Policial, DOW, Departamento di Salubridad y Brandweer Aruba a sinta hunto y a yega na e maneho cu lo ta mas estricto di control p’e distancia social di 1.5 meter, aglomeracion den fin di simannan, siguridad di e localidad y permiso en general. E Taskforce por yega cerca di e doño di negoshi y informa si no ta cumpliendo cu e reglanan cu lo ta stipula den e Decreto Ministerial.
Si un negoshi no mantene su mes na e reglanan aki, boet lo por cay. Tjon a sigui bisa cu Cuerpo Policial ta autorisa pa duna e boet. Si cosnan sali for di man y no kier atene na e reglanan, automaticamente por cera e localidad. Cuerpo Policial lo sigui mantene e ordo publico, unda lo tin control di trafico riba alcohol. Door di tin hopi actividad den fin di siman, e uzo di alcohol ta hopi. Pa loke ta e orario di cierre ta keda 11:00PM, despues di esaki polis lo ta controlando e distancia social y aglomeracion. Polisnan por actua na momento di no mantene na e reglanan.
