Tin trabaonan andando pa asina crea mas espacio pa encarcelamento. KIA definitivamente ta sobre popula y Minister Andin Bikker kier bin cu un solucion mientras tanto.
Durante e conferencia di prensa di gobierno, e mandatario a menciona cu un comision special di entre otro DOW, tambe di e minister encarga cu infrastructura, minister Andin Bikker mes, e taskforce cu ta encarga cu restauracion di KIA y tambe di e miembronan di Warda nos Costa, ta trahando, pa asina mira ki opcionnan por bin cun’e riba mesa, pa por mehora e situacion di KIA, sea ta ampli’e, renob’e, of traha un Instituto Coreccional completamente nobo.
Si wak bon, Ex Huis van Bewaring na Dakota, mester wak si a corto plazo por yega na un restauracion temporal di e facilidad aki. Kier haci uzo di e facilidad aki pa por acapara dos cos, mirando cu e facilidad actual cu tin pa Warda nos Costa, unda cu nan ta uza pa por wanta e personanan ilegal, no ta apto tur ora pa cierto personanan violento cu ta wordo deteni.
E aspectonan
Un persona cu wordo gara cu no tin su permiso na ordo of ta ilegal, ta cay bao di un otro regimen. Esey ta pone cu e facilidad di detencion, hopi biaha ta facilidadnan un tiki menos apto. Tin personanan cu ta hopi agresivo. Por a ripara cu e tipo di personanan aki ta kibra e facilidadnan aki y ta huy. Mirando esaki, a dicidi e ora di bin cu algo temporal y e recomendacion a bin pa bay wak huis van bewaring.
Di dos aspecto ta cu KIA ta sobrepopula. Esey a pone cu mester a duna atencion na esaki. E retonan financiero cu pais Aruba ta pasando aden ta grandi. Pa bay traha un KIA nobo lo bay tuma un poco tempo. E taskforce cu ta encarga pa yega na un KIA nobo, den e proximo dianan aki lo ta reuniendo cu un compania di Merca, cu a tuma nota di e gobierno anterior caba, cual aparentemente a haya un presentacion di nan.
E compania aki ta specialisa den traha unidadnan di prizon pre fabrica. E ta mustra algo interesante, aunke cu no a haya un presentacion ainda. Lo bay evalua si haya un presentacion di nan.
Hecho ta, KIA ta demasiado yen. A haya un raport algun siman pasa for di un comision cu cada aña ta bin evalua KIA y e ta expresa su preocupacionnan pa loke ta e estado di KIA y cu ta haci recomendacionnan cu mas pronto cu ta posibel, haci mehoracionnan. Esey ta un di e motibonan tambe, cu na momento Bikker a bira minister, pa bin cu un taskforce pa traha rapidamente pa un posibel sea renobacion, ampliacion of un KIA nobo. Na final di dia, e reto mas grandi ta keda finansas. Esaki ta un proyecto di un magnitud hopi grandi. Lamentablemente e 8 añanan cu a pasa no a inverti den e facilidadnan aki y esey ta trece su retonan cun’e.
