Mientras cu Aruba Tourism Authority (ATA) ta inverti miyones pa promove nos isla positivamente, ata Mando Policial, bou encarga di Altocomisario Andrew Hoo y Minister mr. Andin Bikker a habri porta pa un ex Polis di Hulanda, e presentado di television, Ellie Lust, bin cubri sucesonan y atraconan riba nos isla. E lo uza tur e noticianan negativo aki pa pasa riba canal di television di Hulanda. Precisamente e dianan cu e tabata “trahando” na Aruba, tabatin varios atraco, ladronicia y mas…pues material e tin pa mustra e mercadeo di turistanan na Hulanda con insigur nos ta na Aruba!
Mas tristo ta cu e ex Polis tabata bisti tur na uniform di Polis di Aruba, cu consentimiento di Altocomisario Hoo. E tabatin permiso tambe pa core den patruyanan di Polis, baha cu Polis tur caminda y drenta cas di hende na momento di asistencia. Hasta den boto di Polis el a trip y monta un show completo. E presentado di television, cu ta gana placa basa riba su propagandanan den su programa, ta papia cu sospechosonan manera cu ta un asistencia e ta dunando, sin cu e personanan sa cu nan lo bay sali te na Hulanda awo! Esaki ta algo cu nunca antes nos a mira pasa den pasado. Pa e Polisnan mes, tabata imposibel kere con nos mesun Mando Policial y nos mesun Minister di Husticia, Andin Bikker, ta presta su mes pa saca paña sushi di bo cas benta riba caya.
E motibo cu ta cay riba e situacion aki ta pasobra na Aruba, e mesun Altocomisario Andrew Hoo, nombra politicamente dor di Minister Andin Bikker, personalmente a traha proces-verbaal pa persigui miembronan di prensa. Awendia tin varios di su coleganan na cas pasobra ta sospecha nan di lo a suministra informacion na Prensa. E caso penal ta den Corte di Apelacion, den cual e maneho aki, unda por mira claramente cu a duna e miembro di prensa Hulandes un “portofoon” di Polis pa e cana cune, cu por papia aki di “gelijkheidsbeginsel” unda tur e motibonan dicon un miembro di prensa di Aruba no por tin acceso na informacion di Polis, e Altocomisario a “lubida” mesora pa complace cu su hefe cu a duna ordo pa duna un radio na un presentado di television Hulandes.
Minister Dangui Oduber mester mira e cosnan aki un tiki mas critico pasobra su colega no por duna man liber pa Mando Policial presta nan mes pa e cosnan aki. Hopi biaha un of mas miembro di Prensa local a purba via nan media pa por tin acceso pa un programa local riba e trabou di Polis y suceso pero sin resultado. Awor ciegamente ta duna un civil acceso pa bisti uniform, core den auto di Polis, baha na asistencia hunga Polis, haci pregunta na antoho y haya contesta pa djey los su programa di TV den exterior pa mustra cosnan malo di nos isla.
Un solo palabra: Aruba ta un bon madrastra y masha mal mama!
