E hecho cu ayera a menciona algun asunto specifico rond di decisionnan tuma pa Minister Andin Bikker cu lo por tin di haber cu actonan contra maneho, contra ley of hasta kisas di corupcion, a causa reaccion awe merdia den un conferencia di prensa den edificio di Cocolishi. E mandatario a desmenti tur e denuncianan y a argumenta tur cu tin di haber cu ne. Tur otro di Otmar Oduber of di POR el a bisa cu e no por papia pa otro hende of e no ta na altura di nada.
Minister Andin Bikker no tabatin’e facil awe durante su conferencia di prensa, pasobra prensa a bombardie cu pregunta, specialmente relaciona cu acusacionnan serio contra dje ayera den Parlamento. Net Bikker, cu semper ta referi na integridad y cu ta un intermediado den diferencianan y cu ta un bon conocedo di ley, lo no a spera cu e ta peca na leynan y normanan di bon gobernacion.
Specialmente den asunto di otorga contract pa huur di edificio y servicio na su Ministerio. El a splica cu Otmar Oduber tabata presidente di e organo mayor cu ta atende cu asuntonan di Fast Track y proyectonan y cu e no tabata mucho envolvi. E no kier a bay den mucho detaye riba ningun pregunta, pero mas bien a desmenti tur.
A puntr’e como lider di POR kico e ta pensa cu un miembro di Parlamento tin contract pa su compania di siguridad cu Serlimar. El a referi pa puntra Alan Howell direct pero e no ta mira nada malo si ta su casa ta doño di e compania. El a purba hustifica cu ata casa di Minister Marisol Lopez (esta Edsel Lopez) ta accountant di Serlimar, cu dicon esey si por. (Fact check: Cinco aña pasa drs. Edsel Lopez a gana un destaho publico pa Grant Thornton haci trabou di accounting. Na momento cu Marisol Lopez a bira Minister, e casa mester a pasa e cliente over na su colega Herbert van Elferen.)
Den e caso specifico di Michael Carty cu a haya un salario di riba 5 mil florin pa luna sin tin e preparacion necesario y cu conseho negativo di DRH, e mandatario a contesta cu e no por papia riba casonan specifico y cu e no ta na altura di tur hende nombra den tur Ministerio. Tampoco e kier a opina como lider di POR riba e practica di nepotismo.
Di a bisa cu no ta sinta den Conseho di Minister mas tanten cu Marisol Lopez ta eyden, pa pidi pa suspende e reunion di Parlamento te cu un proximo aviso ta dos extremo leu for di otro. Riba esey Bikker a hustifica cu Minister Presidente lo intermedia awo y cu lo dun’e e espacio necesario y cu e ta haya cu tur hende mester dun’e un chens pa por logra. E sigur lo duna di su banda y como tal lo sigui atende reunionnan por lo pronto, cu of sin Marisol Lopez den dje.
 | ReplyForward |
