E trahadonan di Stichting Verstandelijke Gehandicapten Aruba (SVGA), a manifesta nan frustracion ayera dilanti di Oficina di Gobierno. Nan ta rabia cu Minister Glenbert Croes a reuni tres biaha caba cu nan sin ningun resultado. Despues di e manifestacion, awo e mandatario a sali bisa cu mester cambia henter e areglo di subsidio. Obviamente un solucion cu lo bolbe dura algun luna largo, prome cu por ehecuta.

“No por ta cu nos ta atendiendo e crisis social di nos Pais y e trahadonan den e sector social mes ta pasando den crisis personal”, asina Minister Glenbert Croes a duna di conoce. Pa e mandatario ta inaceptabel pasobra ta nan ta e ‘frontline’ di e cuido social y no por ta asina cu nan tin añanan largo perhudica, danki na e formula nobo di subsidio introduci 1 di januari 2017.

E asina yama “outputsubsidie” a perhudica tur instancia financieramente di tal forma cu e trahado de facto no por haya promocion cu e tin derecho riba dje. Comosifuera poco, desde a introduci e outputsubsidie, hopi di e trahadonan a keda cu promocionnan pendiente for di 2014, 2015, 2016, sin cu a honra esakinan. Pa colmo ningun departamento gubernamental kier asumi responsabilidad y mas bien ta laba man pa atende cu e asunto aki. Consecuencia? E derecho di e trahadonan ta colga.

Esaki ta e motibo cu a conduci na dos decision di Minister Glenbert Croes. El a institui:
1. Un comision presidi pa Glenda Hernandez, Director di Departamento di Asunto Social (DAS) pa evalua henter e ‘outputsubsidie’ y presenta un propuesta nobo di subsidio cu ta carga aprobacion di tur fundacion.
2. Un comision presidi pa Jenny Quijada, Recurso Humano di Bureau di Minister, cu lo traha riba e promocionnan cu a keda colga for di 2014, 2015 y 2016 pa ‘once and for all’ cumpli cu locual e trahadonan tin derecho riba dje.

Esaki ta dos decision cu ya ta den ehecucion. Lastimamente no a logra termina dentro di e tempo cu e Minister Glenbert Croes a stipula pa su mes, pero a expresa un biaha mas na e trahadonan cu nan por ta sigur cu e lo ta esun cu lo percura pa drecha y honra nan posicion huridico y tur locual cu nan tin derecho riba dje.

Comments

comments