Awe diadomingo, Minister Plenipotenciario di Aruba na Hulanda a anuncia cu su señora a duna luz na un yiu muhe, den un parto cu a tuma luga aki na Aruba den Dr. Horacio E. Oduber Hospital. A yama e baby Zayah Zaína Besaril. E ta bin pa alegra henter famia, cu ta consisti di Minister Besaril, su casa Siglaine y e ruman grandi Nayeli.
Guilfred Besaril di 47 aña ta candidato # 12 riba di MEP den eleccion cu ta tuma luga dia 25 di juni proximo. El a cuminsa su carera politico na aña 2013, den partido Movimento Electoral di Pueblo (MEP). Den su prome salida, net despues di a baha como presidente di sindicato di polis, SPA, el a logra 833 voto riba su nomber.
El a drenta Parlamento di Aruba y den eleccion 2017, el a bay atras y a logra 503 voto. A nombr’e prome como presidente di Parlamento pero despues cu Ady Thijsen no tabata ministeriabel, a manda Besaril pa Den Haag, unda el a tuma e puesto di Minister Plenipotenciario, desde dia 20 di november 2017. El a tuma e puesto over di Juan David Yrausquin.
