Millizienne Richardson ta lansa un perfect mas 14 ponche pa Eagles derota Rockets

Campeonato HEINEKEN fast pitch femenino di Aruba Sofball Bond dedica na dos baluarte Jacobo Jansen y Gilbert “Nando” Maduro a continua fin di siman. Den categoria femenino AA e fuerte equipo di San Nicolas esta Eagles a knockout Rockets di Sta Cruz 10-0. Millizienne Richardson mustrando perfecto den 2 salida ta lansa 13 ponche siman pasa den su promer salidas y 14 strike outs den su di dos wega y no ta permiti careda tampoko hit ni ta regala base por bola esta ningun hungador a jega base y asina ta seya un record nobo esta un perfect game riba su nomber.

Millizienne Richardson a enfrenta 15 bateador y a retira tur den paso de conga lansando 13 bola, 47 strike pa un total di 60 lansamento pa pone e victoria riba su nomber cumpliendo cu un hasaña skirbiendo historia. Di otro banda Mildred Kock Croes ta bay  5 inning tirando 41 bola, 63 strike pa un total di 104 pitch permitiendo 10 careda di cual 7 ta limpi tras di 10 hit regalando 4 base por bola y ta propina 4 ponche pero mester conforma su mes cu e derota riba su nomber.

Boxscore final Eagles 10 careda, 10 hit, 0 error y ta laga 4 coredor na base. Rockets 0 careda, 0 hit, 2 error y no ta laga ningun coredor den circulacion. Mihor bateadornan pa Eagles a resulta Myah Thompson 3-2 incluyendo un doblete y un homerun impuhando 3 careda, Yee Mei Cheong 3-2 cu un doblete y 2 base roba mas 1 careda anota, Millizienne Richardson aportando na su propio causa di 2-2 cu un doblete y 1 rbi, Xiorcaniyx Vargas 2-1 cu 2 rbi mas 2 careda anota, Anchell Statie 2-2 y Sharlanee Richardson 1-1 cu 2 rbi.

Campeonato ta continua diahuebs awor 12 di september pa 7pm “sharp sharp”unda Eagles lo enfrenta Rockets den categoria U17. Diabierna 13 di september pa 7pm Rockets vs Jaguars Vitamin Water AA y pa 830pm Eagles vs Aruba Bank Lady Tigers AA, diasabra 14 di september pa 3pm categoria U17 Lady Blue Marlins lo enfrenta Rockets y pa 5pm Aruba Bank Lady Tigers vs Rockets AA. Pues un total di 5 wega competitivo desde diahuebs pa diasabra awor. Fanaticada ta keda cordialmente invita pa bin apoya nos atletanan femenino. Tur wega lo tuma lugar na Pos Chiquito.

Comments

comments