Campeonato HEINEKEN fast pitch femenino AA di Aruba Softball Bond a continua riba canchanan na Pos Chiquito. E fuerte equipo di Eagles a blankea Jaguars Vitamin Water tras di un tremendo labor riba monticulo di Millizienne Richardson lansando un “One Hitter”. Un bon wega porcierto unda Eagles tabata gana 1-0 te den bom di 5 inning ta logra rally pa 4 careda y asina finalmente gana e partido 5-0. Boxscore final Eagles 5 careda, 7 hit, 1 error y ta laga 6 coredor na base.
Jaguars Vitamin Water 0 careda, 1 hit, 3 error y ta laga 4 coredor den circulacion. Mihor bateadornan pa Eagles ta Myah Thompson y Sharlanee Richardson ambos di 2-1, Yee Mei Cheong di 3-2, Xiorcaniyx Vargas 3-1, Keyla Cham 1-1. Pa Jaguars Vitamin Water Jean Marie Kock a conecta e unico hit y a bay di 3-1. Mellizienne Richardson ta bay e ruta completo cu un otro “rocksolid” performance y ta enfrenta 22 bateador tirando 27 bola, 67 strike pa un total di 94 lansamento, ta permiti un solo hit y no ta permiti careda regalando un base por bola y ta poncha un total di 10 bateador pa seya e victoria riba su nomber.
Di otro banda Kathleen Emerenciana ta perde e partido enfrentando 26 bateador tirando 31 bola y 43 strike bon pa 74 pitch permitiendo 9 careda tras di 7 hit, regalando 3 base por bola y ta poncha 4 contrincante. Diabierna awor playoff ta inicia cu un best out of 3 entre Aruba Bank Lady Tigers vs Jaguars Vitamin Water unda e ganado di e serie aki lo pasa pa e gran final contra Eagles. Softball fast pitch femenino a la carga!
