Mikel Schreuders y Tashaina Seraus ta atletanan di aña di PED

Diabierna anochi a tuma luga Premio Excelencia den Deporte, caminda varios atleta cu a destaca durante henter 2018 a ricibi un reconocimento.

ADV

Como Atleta Masculino di aña 2018, a keda den persona di Mikel Schreuders. Schreuders ta un atleta di natacion kende a logra clasifica pa e campeonato mundial di landamento cu ta bay tuma luga na Sur Corea durante luna di Juli, como tambe pa e Weganan Panamericano 2019.

Como Atleta Femenino di aña 2018, a keda den persona di Thashaina Seraus. Seraus a destaca tanto nacional como internacionalmente den e disciplina di Bowling, ganando entre otro medaya di oro durante e evento di PABCON di Champion of Champions na Brazil.

Como atleta masculino di aña te cu 18 aña, a keda den persona di Giannon Eights. E ta deportista di triathlon, kende ta tuma disciplina y hopi dedicacion pa entrena diferente otro deporte, mas ainda ora bo kier ta bon den cada un di nan. Sigur esaki ta loke cu Giannon a haic durante henter aña 2018, ganando premionan den landamento, coremento, triathlon y duathlon, na nivel nacional como tambe internacional.

Como atleta femenino di aña 2018 te cu 18 aña a keda Elisabeth Timmer. Durante 2018, Timmer a sa di bira campeon nacional di Aruba. Fuera di esey, el a gana un total di 56 medaya (36 medaya di oro, 18 di plata y 2 di brons). E galardonnan aki el a sa di gana den nuebe competencia nacional y internacional, obteniendo 3 high point trophies.

Atleta Masculino di aña 2018 te cu 13 aña, a bay pa Gavin Kock. Gavin a sa di competi den eventonan nacional y internacional. El a logra gana 6 medaya di oro, 6 di plata y 2 di brons.

Atleta femenino di aña 2018 te cu 13 aña a bay pa Liv Farro. Durante 2018, Liv a sa di gana mas di 40 medaya, cual 39 di nan, tabata di oro.

Team Aruba 1, a logra bira e campeonnan di Serie Latino Americano y del Caribe, luchando durante 11 inning largo den un wega maratonico di baseball, halsando e nomber di Aruba den halto.

E cinco landadonan di Crossing for Hope, Davy Bisslik, Stephan Thijsen, Romar Arendsz, Gwendolin Kock-Croes y Deaxo Croes a surpasa tur barera y frontera, cruzando lama entre Venezuela y Aruba, recaudando asina fondonan na beneficio di Koningin Wilhelmina Fonds, cu e deseo pa haci bon pa esnan cu ta sufri di cancer.

Shariska Winterdaal tambe a keda galardona. Tin cu bisa cu e ta un inspiracion pa grandi y chikito. El a dicidi pa core 500 kilometer rond di Aruba, pa asina genera fondo pa muchanan cu a keda huerfano.

E baluartenan di deporte Cedric Bronswinkel, Ricardo “Cadochi” Kock, Francisco “Chico” Faro y Hyacintho “Sonny” Tromp, a ricibi nan medaya di oro pa prome biaha den weganan di Reino na 1967 na Hulanda, marcando asina e hazaña cu cuater Arubiano a logra cu desde un edad jong, a dedica nan mes na deporte.

Francisco “Fico” Vrolijk, no ta un persona desconoci den deporte. E ta conoci pa mantene estadisticanan di futbol, tanto nacional como mundial. Esaki a haci cu el a skirbi e buki “Historia di Futbol di Aruba 1909 – 1959, desde cu internet a haci su entrada. For di tempo cu e tabata mucha e tabata hopi activo den tanto futbol como baseball. Sin conta esey, cu ya for di 1961 Fico a sa di representa Aruba den un forma grandi. Awo nos tin cu warda pa e buki number 2 di Fico.

Benjamin “Roy” Angela a ricibi su reconocimento den deporte. Roy Angela ta un persona cu for di tempo cu e tabata un hoben, ta practica deporte. Durante su bida, el a sa di hunga futbol, basketball, baseball, softball y tambe biljard. El a cuminsa train boxeo pa hopi aña, pero nunca el a haya e oportunidad pa subi ring. Den e ultimo 17 aña, el a dedica di ta un narador y comentarista.

Scol Basico Washington ta ricibi e titulo di Scol Basico di aña 2018, motivando su alumnonan den un forma sano y deportivo.

Deportista masculino di aña 2018 Scol Avansa, a bay pa  Joshwa Jansen. El a sa di representa su mes durante e actividadnan di Ibisa, cu disciplina y demostrando cu e ta bon prepara.

Mary-Ann Pieters a logra e titulo Deportista femenino di aña 2018 Scol Avansa.

Vince Ramada ta logra e premio di Deportista masculino di aña 2018 scol basico. E tabata participante den diferente deporte na scol.

Dixienne Saavedra a logra e titulo di Deportista Femenino di Aña 2018 scol basico. Dixienne a sa di participa den varios competencia escolar di IBISA durante e aña escolar y cu bon resultado.

Yurwin Gomes a ricibi e titulo di Atleta di Aña 2018 den Paralymics pa su esfuersonan deportivo durante e aña. Gomes ta practica e disciplina di atletismo desde 2016 y su specialidadnan ta 100, 200 y 400m sprint. Na 2018, el a sa di competi na Colombia, hisando Aruba den halto den e competencia di Sprint Internacional.

Elliott Loonstra a logra e titulo di Atleta di aña 2018 den Paralympics. E ta e prome atleta para-taekwondo di Aruba. Na Juli, el a participa den e Para-Pan American Taekwondo US Open na Washington, Merca, cual tabata su prome experiencia den competencia internacional. El a logr’e tambe cu bon resultado. El a sa di posiciona su mes como number 40 den 56 atleta mundialmente y ta number 3 den e region Panamericano.

Atleta di aña 2018 Special Olympics a bay pa Johnny Perez. Perez ta miembro di Special Olympics desde 2005 y a participa den tur campeonato local di special Olympics desde 2010. Perez a forma parti di e seleccion di Aruba cu a competi den Special Olympics World Games cu a tuma luga na Abu Dhabi algun siman atras.

Palabra di pabien ta bay na tur e atleta y baluartenan cu a ricibi nan galardon.

Comments

comments