Mike Eman: Si t’asina nos Ministerio Publico ta funciona, AVP lo cuminsa cana caminda di Ministerio Publico pa tur cos cu no ta corecto.

Aruba ta confrontando un desaroyo sumamente preocupante den husticia. Partido AVP kier comparti no solamente su preocupacion pa e situacion aki, pero tambe su pensamento pa loke ta trata e situacion sumamente preocupante aki di husticia na Aruba. Lider di partido AVP, sr Mike Eman a splica cu e preocupacion aki ta trata e funcionamento di Ministerio Publico na Aruba, bou di un presion continuo di politica partidista.

Sr Mike Eman: “Nos ta sumamente preocupa cu durante di añanan, no solamente di e periodo aki pero desde Status Aparte, a nota un patronchi consecuente di partido MEP caminda cada bes cu nan ta den oposicion y AVP ta den gobernacion,  ta inicia un campaña di acusacion, di atacha integridad y trece duda den funcionamento di Gobierno y Gobernantenan. Tambe ta cuminsa entrega kehonan, fabrica rapportnan. Despues ta mira con ora cu nan (MEP) drenta Gobernacion, manera a sosode den añanan 80, sistematicamente ta cuminsa cu persecucion di Gobernantenan di AVP. E patronchi aki a ripiti su mes den añanan 90 y despues den 2000, siguiendo mesun modus operandi di pone presion politico riba funcionamento di Ministerio Publico. “

Esaki, segun Miker Eman ta algo sumamente peligroso pa un estado di derecho, pasobra Ministerio Publico, Landsrecherche y Polis mester ta instancianan totalmente los di influencia politico. For di momento cu mira politiconan, parlamentarionan of gobernantenan, sistematicamente ta purba influencia decisionnan di Ministerio Publico y otro organonan hudicial, bo ta trece e independencia di husticia na peliger. Y Bo ta trece un situacion sumamente peligroso pa cada ciudadano di nos pais.”

E lider di AVP a splica e ley bou cual Ministerio Publico ta funciona na Aruba. Den e leynan aki Ministerio Publico ta e unico instancia cu tin e autoridad pa persigui un hende den nos pais. Den e proceso tin momentonan cu Ministerio Publico por kita e libertad di un ciudadano. Pa ora su caso yega corte ya e ciudadano por a perde hopi dia di su libertad y e por a perde e cos mas grandi cu e tin cu ta su reputacion. Pa un politico esaki ta aun mas importante, pasobra na final nos ta para pa ken nos ta como ciudadano, pa e integridad y honestidad cu cualnos kier sirbi nos pais.Y for di e momento cu esaki por wordo atacha pa motibonan politico, nos ta yega den un situacion sumamente preocupante den nos pais.

Cua caso ta persigui

E “principio di oportunidad” ta e base di e autoridad di Ministerio Publico pa dicidi si ta persigui den un caso of  den un otro. E princpio aki ta nifica cu Ministerio Publico no ta persigui tur caso, pero ta scohe cua caso e ta envestiga y persigui. P’esey ora cu un partido politico pa medio di su parlamentarionan y gobernantenan ta cuminsa insisti, persisti y pone presion riba OM pa e haci uzo di su autoridad pa scohe cua casonan e ta persigui, y scohe den linea di loke nan ta desea, e ora Aruba ta den un situacion hopi peligroso pa estado di derecho y proteccion di derecho di cada ciudadano. 

E experencia di Aruba ta cu MEP ta conoci pa mete den Ministerio Publico. Esaki ta un tentacion pa politiconan cu no tin otro forma pa goberna, ta bay defama y persigui otro y no ta resisti e tentacion di hasta cuminsa influencia Ministerio Publico, pa cana e caminda partidista cu nan ta desea. (Kier men: scohe e casonan cu nan (MEP) kier pa persigui.) Y el a sosode sistematicamente den e periodonan di gobernacion di MEP. P’esey AVP ta bisa cu pa 30 aña largo a wanta e tipo di atakenan aki. Si t’asina e patronchi di perecucion politico ta, anto AVP tambe ta bay cuminsa cana caminda di Ministerio Publico pa haci denuncia tur cos cu ta incorecto of cu ta hole robez. “Mescos cu nan a haci durante 30 aña, pero cu nos si no a haci, pasobra nos a prefera di traha y pone pueblo na prome luga y no pensa riba ken por kier cera. Si esaki ta e modus operandi, e momento a yega pa nos hunga na mesun nivel pa duna comunidad un bista mas cla na kico e tipo di politica asina ta conduci na dje pa comunidad.”