Despues di un siman agitador unda di tur skina tabatin malcontento y desorden, lider di partido berde mr Mike Eman cu palabranan bon escohi a dirigi su mes na pueblo brindando animo den un discurso nacional. Cu palabranan cu a penetra den curazon di tur hende riba e isla aki, Eman a splica cu no por ta asina cu den un periodo cortico Aruba a haya su mes den un recesion penoso mientras cu no tabatin motibo valido pa esaki.
Eman: “Como ser humano nos ta imperfecto, pero e caminda di buskeda di perfeccion ta yen di momentonan bunita di logro, di progreso, di solidaridad, di convivencia. Ora nos a dirigi nos pais, cu boso mandato pa trece felicidad y un sentido di un pais husto atrobe no tabatin nada otro den nos mente cu e trabao grandi aki, di cumpli cu e confianza grandi, e confianza presta.”
Eman tabata hopi cla ora el a mustra riba e echo cu ningun momento a pensa riba retira, persigui, intimida esnan di otro partido of otro opinion. Rabia, rencor of odio no tabata e motivacion, pero felicidad di e prohimo, sea cual sea su color politico, opinion of origen, prosperidad comparti cu hentere pueblo tabata e mision. “Mi ta bisa esaki awenochi rumannan, pasobra nos por ta bon of malo den nos intencion y proposito y no ta color geel of berde ta determina esaki, pero kico realmente ta biba den nos alma y curason. Tentacion tin hopi, pa cede na rincor, pa lubida promesa, pa busca probecho y lubida lo demas. Na ta imperfeccionnan di e ser humano, e falta di compasion, e ignorancia di dolor di otro. Nan ta marca nos inabilidad pa uza nos capacidad y conocemento pa e bienestar di nos prohimo.”
Eman a splica cu den su partido el a para semper na banda di defende tolerancia y supera e tentacion di revancha na momento cu e hendenan tabata indigna pa tanto abuso di poder y persecusion di e otro banda.
“Pueblo mester ta uni pa e normanan aki, pasobra awe nos ta mira con hopi ta perde trabao y porvenir di nan famia, pa motibo di nan color politico y pensa cu e maldad aki no lo yega na bo porta te ora cu e presenta. Nos ta bib’e awe. Pesey e momento aki ta di importancia grandi pa futuro di nos pais. Awe, no mayan nos tin cu dicidi cu locual ta biba den alma, curason y consenshi di esnan cu ta dirigi nos ta conta y no nos color politico.
“Mira bo ministernan, mira e parlamentarionan di gobernacion, scucha nan tono, si e ta ofensivo pa nan oponentenan mayan e por ta ofensivo pa bo tambe. Mira nan actitud, si e ta intimidante pa nan criticonan mayan e por ta intimidante pa bo tambe. Mira nan prioridad, si e ta di negligencia di esnan cu no ta cerca di nan, mayan sigur bo tambe lo worde ignora. Mira nan trato di otro, den decision, maneho, lenguage of accion y realisa cu mayan por ta abo”.
Tanto odio, probecho personal, division, rencor y incapacidad no ta normal. Nos a marcha di prome momento y lucha pa esaki NO yega cerca otronan, nos a bringa pa pobresa causa na oponentenan politico NO yega na porta di henter nos pueblo, porta awe nos tur ta realisa mihor cu esaki NO por ta un lucha di algun pa tur, pero tur pa tur.
E bondad den nos no tin color, no tin edad, no tin origen, e ta un potencial den nos cu nos mester cultiva cu hopi pasion y fe. Den e añanan cu mi tabata tin e honor di dirigi nos pais, no tabata tin un siman cu mi no tabata bishita nos barionan y hogarnan pa mi keda cu pia na tera, orea na curason di nos hendenan, comprendiendo tur dia kico ta e nececidad di nos comunidad, nan inkietud y nan soñonan, geel, berde of cualkier color, edad of origen.
Nos no a wak atras. Nos a wak padilanti. Tabatin asina hopi pa haci cu no a cruza nos mente mes pa perde tempo cu pasado, pasobra nos a haci un compromiso cu futuro. Pa no ignora e nececidad y derecho di otro color, pasobra nos a haci un compromiso cu henter Aruba. Nos no a perde orientacion di nos mision, pasobra nos a prepara nos mes pa e reto.
E resultado ta mas cu evidente. Hunto nos a carga nos pais y rescate for di e crisis social economico cu nos a hay’e aden y renobe for di e deterioro total cu el a wordo laga aden y dun’e progreso, perspectiva y oportunidad. Nos a mira nos dilanti un mayan nobo pa nos pais caminda Aruba ta lidera den temanan global di sostenibilidad cu a duna Aruba reconocimento den mundo henter. Nos a wordo yama y delega dor di Reino Hulandes pa presenta e modelo berde di Aruba den mundo henter.
Nos tabata sigur, manera Presidente Kennedy a yega di bisa di e ambicion pa explora cosnan grandi pa futuro, cu energia, fe, devocion cu nos lo trece na e empeño aki lo ilumina Aruba y tur cu ta sirbi’e. Cu un consenshi husto, historia lo ta nos recompensa y lo ta e ultimo huez di nos echonan, laga nos guia nos Dushi Tera puntrando nos Creador su Bendicion y su ayudo, sabiendo cu riba e mundo aki nos tin cu haci su trabou esun di nos.
E momento aki no ta uno di apelacion riba un color politico, pero di mira den locual nos tin awe un fenomeno cu a toca nos cu NO ta normal y nunca mag bira e standardnan di gobernacion. Nunca mag di bira e nivel di midi di e Pueblo y e Pais aki. E trabao di remplaz’e ta urgente. Un apelacion riba tur gremio y ciudadano di nos pais pa laga nos uni den recobra e destino di nos Pueblo y Pais.
Ningun hende ta perfecto, e caminda di perfeccion ta yen di cosnan bon y bunita. For di mi curason y alma semper mi a sinti esaki y a purba di traha cu amor y dedicacion. Semper husto, cu humildez, nunca cu rabia pa nos oponentenan. Semper den dialogo y respect pa partnernan social, nunca cu mal uzo y arogancia di poder, dunando tur espacio y tempo cu mester pa yega na desicionan balansa y husto.
Esaki ta virtudnan cu nos a haya di e base di nos existencia. Amor Prohimo, solidaridad y convivencia pa otronan. Husto pa cu tur hende. Esaki nos ta bai tin mester pa ta cla pa rescata Aruba atrobe for di antagonismo, persecusion, rencor, abismo y polarisacion. No un Pais di gobernantenan cu ta pensa den color politico, pero di sirbidornan cu curason pa tur hende y asina haci nos isla un Dushi Tera cu gobernacion y liderazgo di aprecio y amor cu vision y bon voluntad pa garantisa felicidad pa un y tur.
